Rəhman Hacıyev: "Qarşıda böyük layihələr və inkişaf tendensiyaları durur "
Təhsil elə bir sahədir ki, hər bir ailəyə aidiyyatı var. Bəlkə elə buna görədir ki, elə ən çox tənqid olunan sahə də təhsildir. Çünki təhsil hər an gözümüzün önündədir.Müasir zəmanənin təhsilvermə qaydaları dəyişdiyindən artıq valideynlər təkcə müəllimlər arasında seçim etmir, eləcə də məktəbin keyfiyyətinə diqqət yetirir. Keyfiyyətli, səliqəli, zəngin dünyagörüşə sahib olan kadrları ətrafında cəmləyən məktəb övladını düşünən hər bir valideynin üz tutduğu təhsil ocağıdır.
İLK MÜSAHİBİM...
(Nəsimi rayonunda yaşayan bir tanış valideyinin dediklərindən)
“Mənə görə, indi məktəb seçimi ən çətin məsələlərdəndir. Dünya dəyişir, dünyaya baxış dəyişir. İndiki məktəblilərin istəyi də fərqlidir. Müəllimlərdən yeni yanaşma tələb edilir. Çox təəssüf ki, ölkədə bu istəklərə cavab verən məktəblər o qədər də çox deyil. Ancaq mən seçimimi etmişəm. Övladlarım 211 nömrəli tam orta məktəbdə təhsil alırlar. Tam əminliklə deyə bilərəm ki, orada təhsilin keyfiyyətindən tutmuş, tədris, təlim-tərbiyə, müəllimlərin ciddi tələbkarlığı, onların şagirdlərə yanaşmasına qədər hər şey yüksək səviyyədədir. Şəxsən bu göstəricilər məni qane edir. İndi valideynlərin ən çox şıkayətləndiyi məsələ uşaqların məcburən dərs oxumasıdır. Bu məktəbdə isə təhsil alan şagirdlərə bunun üçün heç bir məcburi üsul tətbiq edilmir. Məktəbdə elə bir tələb var ki, uşaqlar özləri hətta istəməsələr belə, məcburən dərslərinə hazırlayacaqlar. Şagirdlərdə məktəbə hazırlıqsız getməyin qorxusu var. Bütün dost-tanışların fikirlərinə rəğmən onu deyə bilərəm ki, mən uşaqlarımın təhsil aldığı yerdən çox məmnunam. Bu məsələdə məktəbin direktoru Rəhman Hacıyevin böyük əməyi var. Buna görə Rəhman müəllimə ancaq və ancaq təşəkkür edirəm. Orada əsl təhsil ab-havası var.
İLK TANIŞLIQ...
Məktəb minlərlə insanı özündə birləşdirən böyük bir ailədir. Bu ailəyə aid olan hər bir kəs məktəbin ən gözəl sözlərlə tərif edilməsini istəyirsə öz bilik, bacarıq və əməyini birləşdirərək çalışmalı, irəlidə getməyi bacarmalıdır. Bütün bunlara nail olmaq üçün idarəetmə düzgün qurulmalıdır ki, orda hamı özünü rahat hiss etsin. Məktəb rəhbərliyi, müəllim və valideynlər arasında səmimi münasibət olarsa şagird o doğmalığı hiss edəcək, məktəbə həvəslə gələcək, bunun nəticəsində də şagirdin bilik və bacarıqlarının əsasında uğurlar artacaq.Fransız yazıçısı Marsel Sesiro deyib: “Təbiətə qalib gəlmək üçün əvvəlcə ona itaət etmək lazımdır”. Demək ki, qalibiyyətin digər baş ucu itaət adlanır. Qalibiyyətin sonu isə uğur deməkdir. Məktəbin uğurunu düşünsək bu uğur şagirddən, şagirdin uğurunu düşünsək təbii ki, müəllimdən başlayır. Bakı şəhəri, Nəsimi rayonu 211 saylı tam orta məktəbin direktoru Rəhman Hacıyevin sözləri bu fikrə qüvvət verir: “Hər bir məktəb direktorunun arzusudur ki, rəhbəri olduğu məktəb uğurlu məktəb kimi tanınsın. Bunun üçün ən önəmli amil, sağlam mühitdir. Sağlam mühit varsa, pedaqoji kollektiv işə, şagirdlər dərslərinə daha məsuliyyətlə yanaşacaq ki, bu da uğurların çoxalmasına, məktəbin digər məktəblərdən fərqlənməsinə səbəb olacaq”.
Rəhman Hacıyev 2012-ci ildə “Heydər Əliyev və Azərbaycan Respublikasında gənclər siyasəti” (1993-2003) mövzusunda dissertasiya müdafiə edib, tarix üzrə fəlsəfə doktoru elmi dərəcəsi almışdır. “Azərbaycan gəncliyinin himayədarı” adlı monoqrafiyanın, elmi –metodik məqalənin müəllifidir.
Nəsimi rayonu 211 saylı tam orta məktəbin direktoru Rəhman Hacıyev deyir ki, vaxtilə geridə qalan bir məktəbi dircəltmək, nümunəvi təhsil ocagına cevirmək asan məsələ deyildir. Deməli ugur qazanmaq gərgin zəhnət tələb edir. Bir də vəzifə məsuliyyəti. İndi bu ümumtəhsil müəssisəsi sözün həqiqi mənasında uğurları ilə öyünə bilən təhsil ocaqlarındandır. Burada təhsilin keyfiyyəti, nizam-intizam yüksək səviyyədədir. Təhsil müəssisəsində bilikli və təcrübəli müəllimlər çalışır, onlar bacardıqlarını öz şagirdlərindən əsirgəmirlər.
Məktəb çox səliqəlidir. Sinif otaqları təzə parta, stol və stullarla, dərs ləvazimatı ilə təchiz olunub. Otaqlarda hər bir fənnə aid lövhələr asılıb. Ümumi zalın divarında isə milli qəhrəmanlarımızın portretləri, "20 Yanvar", Xocalı faciəsi ilə bağlı fotolar asılıb. Bir jurnalist kimi Rəhman müəllimdən məktəbin qayğıları, sosial problemləri ilə maraqlandıq. Nə qədər mehriban, səmimi görunsə də, bir o qədər də ciddidir. Öz vəzifəsinin öhdəsindən layiqincə gəlir, olduqca tələbkardır. Ona görə də məktəbdə nizam-intizam yüksəkdir.
Öyrənirik ki, 211 nömrəli tam orta məktəb 1963-cü ildə istifadəyə verilmişdir. Məktəb şəhid Akif Abdullayevin adını daşıyır. Azərbaycan Respublikası Prezidentinin Sərəncamına əsasən, məktəb üçün 2008-ci ildə 200 yerlik əlavə korpus tikilmiş, 2013-cü ildə əsas korpus əsaslı təmir edilmişdir. Məktəb 1200 yerlikdir. Məktəbdə 71 sinif otağı, kimya, biologiya, fizika, informatika, gənclərin çağırışaqədər hərbi hazırlıq kabinetləri, laboratoriyalar, idman zalı, akt zalı, kitabxana, tibb otağı, bufet fəaliyyət göstərir. Məktəbdə 122 müəllim, 2 nəfər psixoloq, 1 nəfər uşaq birliyi təşkilatı rəhbəri şagirdlərin təlim və tərbiyəsi ilə məşğul olur.
Direktor bizi təhsil ocağı ilə tanış edərək dedi: "Məktəbimizdə adətən şagirdlərin davamiyyəti yüksəkdir. İcazəsiz dərsdən qalmaq və gecikmə hallarına yol verilmir. Dərslərinə zəif hazırlaşan şagirdlərin valideynləri ilə mütəmadi görüşlər keçirir və bu haqda onlara məlumat veririk. Fənn müəllimlərimizin və valideynlərin köməyi ilə yaxşı oxuyan və əlaçı şagirdlərin sayı artır. Qazandıgımız yaxşı nəticələr müəllim və şagird kollektivini daha da ruhlandıraraq dərsin keyfiyyətinə, şagirdlərin biliklərinin artırılmasına müsbət təsirini göstərib."
Qeyd edək ki, məktəbdə təhsilin bütün pillə və səviyyələrində təhsilin keyfiyyətinin yüksəldilməsi əsas prinsip olaraq götürülür. Təlim-tərbiyə prosesimiz zəngin ənənələrimizə, milli-mənəvi və ümümbəşəri dəyərlərə əsaslanır. Məktəbdə keçirilən məktəbdaxili və sinifdənxaric tədbirlər, müsabiqə və yarışlar şagirdlərimizin əqli inkişafına, dünyagörüşlərinin genişlənməsinə, mənəvi cəhətdən kamilləşməsinə xidmət edir. Maraqlı tədbirlər, təhsilə yeni yanaşma bir deyil, onlarladır. Elə gün olmaz ki, məktəbdə yeni bir ugura imza atılmasın. Sözsüz ki, bu qələbələrin qazanılmasında direktor Rəhman Hacıyevin əməyi böyükdür.
Bəli, ömrünü balalarımızın işıqlı sabahı yolunda şam kimi əridən təcrübəli pedaqoq Rəhman Hacıyev təkcə müəllim kollektivinin deyil, eyni zamanda şagirdlərin də əzizinə, doğmasına çevrilmişdir. Onun gərgin fəaliyyəti geniş və ürəkaçandır. Direktoru oldugu məktəbin inkişafındakı böyük irəliləyişlərdən söz düşəndə Rəhman Hacıyev deyir: “Bu, hələ harasıdır. Qarşıda böyük layihələr və inkişaf tendensiyaları durur. Məqsədimiz məktəbimizi birincilər sırasına çıxarmaqdır”.
YAZIYA KİCİK SÖZARDI:
.
..Yol boyu ikirləşirəm ki, 45 dəqiqə ərzində şagirdlərə biliyi, informasiyaları çatdıra bilmək əsl fədakarlıqdır. Azərbaycan dilinin incəliklərinə vararaq onları şagirdlərə təqdim etməsi mənə vaxtilə Heydər Əliyevin ana dilimizlə bağlı dediyi fikirləri xatırlatdı: “Hər bir xalq öz dili ilə yaranır. Ancaq xalqın dilini yaşatmaq, inkişaf etdirmək və dünya mədəniyyəti səviyyəsinə qaldırmaq xalqın qabaqcıl adamlarının, elm, bilik xadimlərinin fəaliyyəti nəticəsində mümkün olur”. Düşünürəm ki, biliklə pedaqoji təcrübə birləşəndə nəticə uğurlu olur. Belə müəllimlər çoxaldıqca təhsilin səviyyəsi zaman-zaman yeni inkişafa qədəm qoyur. Bu yerdə türk dünyasının görkəmli filosofu Əbu Turxanın da fikirlərinə istinad etməyə bilmirəm: “Böyük şəxsiyyətlər tarixin sütunlarıdır. Onlar nə qədər möhkəm olsa, cəmiyyətin inkişafı da bir o qədər dayanıqlı olar”.
Bu fikirləri ən çox təhsil sahəsində çalışan bilikli, təcrübəli müəllimlərə aid etmək daha doğru olar. Çünki müəllim cəmiyyətin sütunudur. O, nə qədər bacarıqlı, istedadlı, peşəsinə sədaqətli olsa gələcəyimizdən arxayın ola bilərik. Bütün bunların bariz nümunəsi təcrübəli pedaqoq Rəhman Hacıyevin direktoru olduğu Nəsimi rayonu 211 saylı tam orta məktəbin timsalında gördüm. Bu fikirləri ifadə etməkdə məqsədim budur ki, qoy təhsil sahəsində çalışanların hər biri bu məktəbin uğurlarından xəbərdar olsun. Mən də məktəbin bütün kollektivinə, müəllim kontingentinə can sağlığı və uğurlar arzulayıram!
Lətafət,
BİA.az.
