Rusiyada Azərbaycana qarşı təzyiqlər: Populizm və məsuliyyətsizlik bir xalqın taleyini riskə atır

Son günlərdə Rusiyanın müxtəlif şəhərlərində Azərbaycan diasporasına qarşı artan təzyiqlər artıq təsadüfi yoxlamalarla izah olunmayacaq qədər sistemli və məqsədyönlü xarakter daşıyır. Bu basqılar – hüquqi təzyiqlər, iş yerlərində yoxlamalar, ailələrə qarşı psixoloji və sosial təhdidlər – təkcə inzibati deyil, eyni zamanda siyasi mesaj daşıyır. Açıq şəkildə görünür ki, bəzi daxili ritorikaların cavabı diasporamızın timsalında verilir. Bu prosesin fonunda ictimai müstəvidə, xüsusilə də sosial şəbəkələrdə məsuliyyətsiz şəkildə səsləndirilən bəyanatların, emosional çıxışların və geopolitik reallıqdan uzaq populist çağırışların ağır nəticələri özünü göstərməyə başlayır.

Ölkədə və xaricdə bəzi media platformalarında, sosial şəbəkələrdə özlərini “ekspert” və ya “müxalif düşüncə sahibi” kimi təqdim edən şəxslər tərəfindən Rusiyanı hədəf alan sərt çıxışlar son aylarda artıb. Bu çıxışların nəticəsində isə artıq Rusiyada yaşayan milyonlarla soydaşımız təzyiqlərlə üz-üzə qalıb.

Azərbaycanın xarici siyasəti tarazlıq üzərində qurulub. Rusiya ilə sərhəd ölkəsi olan Azərbaycan üçün bu tarazlığın qorunması həyati əhəmiyyət daşıyır. Bakı-Moskva münasibətləri hər zaman dinamik və bəzən mürəkkəb olsa da, bu əlaqələr qarşılıqlı maraqlar çərçivəsində qorunub saxlanılıb. İndi isə daxildən aparılan sərt ritorikaya görə həmin tarazlığın pozulması riski artır.

Söz azadlığı, şübhəsiz ki, müasir cəmiyyətin təməl prinsiplərindən biridir. Amma bu azadlıq heç zaman şəxsi ambisiyaların, xarici sifarişlərin və ya sosial şəbəkə uğurlarının alətinə çevrilməməlidir. Əgər bir şəxsin “fikrini azad ifadə etmək hüququ” milyonlarla soydaşın həyatına təhdid yaradırsa, burada məsuliyyət anlayışı ön plana çıxmalıdır. Təəssüf ki, bəzi şəxslər bu məsuliyyətin fərqində deyil. Onlar sosial mediada izləyici toplamaq, özünü önə çıxarmaq və ya siyasi oyunlara qatılmaq üçün xalqa, diasporaya və dövlətçiliyə zərər verən ritorika formalaşdırırlar.

Rusiyada yaşayan milyonlarla azərbaycanlı artıq özlərini təhlükədə hiss edir. Onlar hər gün hüquqi, sosial və psixoloji təzyiqlərlə qarşılaşır. Bu insanlar nə Azərbaycan daxilindəki ritorikanı formalaşdırıb, nə də onun nəticələrinə nəzarət edə bilər. Amma hazırda bu ritorikanın bədəlini onlar ödəyir. Bu, ədalətsiz bir mənzərədir. Və məsuliyyətsiz çıxışların səbəb olduğu bu zərər – nə qədər ağır olsa da – geri çevrilməlidir.

Media azadlığı ilə yanaşı, peşəkar jurnalistika anlayışı da vacibdir. “Analiz” adı altında yayımlanan şərhlərin bir qismi nə gerçək siyasi dəyərləndirmədir, nə də ictimai maraqlara xidmət edir. Bu, sadəcə emosional və reytinqə hesablanmış çıxışlardır. Belə çıxışlar isə Azərbaycan cəmiyyətinin daxilində çaşqınlıq, xaricdə yaşayanların isə həyatı üçün real təhlükə yaradır.

Bu gün baş verənlər sadəcə daxili siyasi müzakirənin nəticəsi deyil – bu, bir xalqın taleyidir. Azərbaycanın geosiyasi reallığı, regional mövqeyi və diasporasının yayılma coğrafiyası daha məsuliyyətli və strateji yanaşma tələb edir. Əgər kimlərsə bu məsuliyyəti üzərinə götürə bilmirsə, ən azından susmağı bacarmalıdır.

Gəlin unutmayaq: Dövlətçilik təkcə siyasi strukturlar deyil – bu, həm də milli düşüncə, ictimai məsuliyyət və xalqın təhlükəsizliyinə olan ortaq qayğıdır.