Bakıda bu şadlıq sarayı 2 milyona satıldı: söküləcək...
Bakının Xətai rayonunda, Gəncə prospekti 28 ünvanında yerləşən məşhur “Şəms” şadlıq sarayının satıldığı bildirilir.
Yerli sakinlərin Yenipress.az-a verdiyi məlumata görə, şadlıq evinin Sabir adlı sahibi obyekti 2 milyon manata satıb. O, yaxınlıqda yerləşən və icarəyə verdiyi obyektlərdən icarədarları da çıxarıb və hazırda özünə yeni ofis və mərasim evi hazırlamaqla məşğuldur.
Qeyd edək ki, “Şəms” bir müddətdir mərasim evi kimi fəaliyyət göstərir.
İddialara görə, “Şams” mərasim evini tikinti şirkətlərindən biri alıb. Ehtimal edilir ki, mərasim evinin yerində yeni göydələn tikiləcək.
Həmin ərazidə, 269 saylı məktəbin önündə artıq tamamlanmaqda olan yeni göydələn tikilib. Hələ o zaman sakinlər yeni göydələnin sıxlığı artıracağına etiraz etsələr də, sakinlərin narazılığına kimsə fikir vermədi. Mərasim evinin yerində də daha bir göydələnin tikintisi gerçəkləşərsə, artıq bu məhəllədə yaşamaq qeyri-mümkün olacaq.
Yerli sakinlər hazırda məhəllədə maşın saxlamaq mümkün olmadığından gecələr “Şəms” mərasim evinin həyətindən istifadə edirlər. Yeni tikilən binaya sakinlərin yerləşməsi başlayandan sonra vəziyyətin necə olacağını təsəvvür etmək mümkün deyil. Üstəlik, “Şəms” mərasim evinin yerində növbəti bina tikilərsə, vəziyyət tamamilə dözülməz olacaq.
Qəribəsi odur ki, bu dözülməz şəraiti iş adamları yaradır, onlar pul qazanmaq üçün hər şeyə gedirlər, Xətai rayon İH və Dövlət Şəhərsalma və Arxitektura Komitəsi isə bu qanunsuzluqlara icazə verir.
