Pakistan WDS-2024-də “Fəth-II” raketini təqdim edib
Pakistan istehsalı “Fatah-II” (“Fəth-II”) raketi Səudiyyə Ərəbistanının Ər-Riyad şəhərində keçirilən WDS-2024 sərgisində nümayiş etdirilir.
“Poliqon” “Army Recognition”a istinadən xəbər verir ki, Pakistanın “Global Industrial & Defense Solutions” (GIDS) tərəfindən hazırlanmış “yer-yer” təyinatlı “Fəth-II”, “Fəth-I” raketinin xələfidir.
“Fəth-II” raketi mürəkkəb naviqasiya texnologiyalarını (INS+GNSS) özündə birləşdirir. O, nişan alma, yerləşdirmə və oriyentasiya üçün avtomatik sistemlə tamamlanan həm salvo, həm də qeyri-salvo atəş rejimlərini dəstəkləyir. Raket 100 ilə 290 kilometr məsafədə 50 metrdən az dairəvi sapma ilə hədəfi vura bilir. Onun yerli variantı 400 km, ixrac versiyası isə 290 km məsafədə təklif olunur.
Xatırladaq ki, ötən ilin dekabr ayında “Fəth-II” raketinin atış sınağı həyata keçirilib.
