Türkiyənin ilk astronavtı kosmosa uçur
Türkiyənin ilk astronavtı Alper Gezeravcının kosmos səyahətinə başlamasına saatlar qalıb. Bu gecə saat 01.11-də baş tutacaq təqdimatı İstanbul və Ankaradakı meydanlardan və elm mərkəzlərindən izləmək mümkün olacaq.
Bizimyol.info Türkiyə mətbuatına istinadən xəbər verir ki, Sənaye və Texnologiya naziri Mehmet Fatih Kaçır və elm adamlarından ibarət nümayəndə heyəti, Respublika tarixində ilk insanlı kosmos missiyası üçün Floridada keçiriləcək buraxılış mərasimində iştirak etmək üçün ABŞ-a gedib.Türkiyədə başda İstanbul və Ankara olmaqla bəzi şəhərlərdə təqdimat mərasimini izləmək üçün hazırlıqlara başlanılıb. Taksim, Kızılay kimi meydanlarda planetariumlar quruldu. Türkiyədə təqdimat mərasimini izləmək üçün digər yerlər elm mərkəzləri olacaq.
"Axiom Space"in Beynəlxalq Kosmik Stansiyaya göndərəcəyi "Ax-3" missiyası üçün 4 nəfərlik ekipaj hazırlanıb. Gezeravcının "Ax-3" uçuşunda iştirak edəcəyi şəxslər ABŞ və İspaniyanı təmsil edən missiya rəhbəri Michael Lopez Alegria, İtaliya Hərbi Hava Qüvvələrindən pilot Valter Villadei və Avropa Kosmik Agentliyi adından iştirak edən isveçli Markus Uandt olacaq. Floridadan buraxılış bu gecə (cümə axşamı) Türkiyə vaxtı ilə saat 01.11-də baş tutacaq. Beynəlxalq Kosmik Stansiyaya qoşulma cümə günü saat 13.15-də baş tutacaq. Bu addımla Türkiyənin 2021-ci ildə açıqladığı Milli Kosmos Proqramının ilk insanlı kosmos missiyası hədəfinə çatacaq.
Açılış mərasimi bu gün saat 23.00-dan etibarən Kızılay və Taksimdəki planetariumlardan izlənilə bilər. İstanbul və Ankarada Sənaye və Texnologiya Nazirliyi tərəfindən meydanlarda “qübbəli çadırlar” adlanan nəhəng günbəzli sahələrdən hazırlanmış planetariumlar yaradılıb. Ərazinin ətrafına Alper Gezeravcının fotoşəkilləri, Sənaye və Texnologiya Nazirliyi, Türkiyə Kosmos Agentliyi, Milli Texnologiya Hərəkatı və Türkiyənin ilk insanlı kosmos missiyasının loqoları yerləşdirilib.
Digər tərəfdən astronavtın kosmos stansiyasına səyahətini Ankara ODTÜ şəhərciyində yerləşən TÜBİTAK Kosmik Texnologiyalar Araşdırma İnstitutu Yer Stansiyasında çalışan kosmos mühəndisləri və elm adamları izləyəcək. Bu mərkəzlərdə seminarlardan tutmuş kosmik filmlərə qədər bir çox proqramlar keçiriləcək.
