“Yunan əfsanəsində olan Amazonlar Azərbaycanda yaşayıb” – “Observer”
Yunan əfsanəsinə görə, Amazonlar dünyanın ucqar nöqtələrində yaşayan cəsur qadın döyüşçülər olub. Arxeoloqlar onların həqiqətən mövcud olduğuna dair getdikcə daha çox sübut aşkar edir.
Yeniavaz.com “Observer”ə istinadən xəbər verir ki, bu barədə aprelin 6-da yayımlanacaq “Bettany Hughes' World Treasures” (“Bettany Hughes-in dünya xəzinələri”) adlı yeni serialında məlumat verilib.
Bildirilir ki, Azərbaycanda Naxçıvanın Tunc dövrü nekropolunda aparılan qazıntılar zamanı qadınların ülgüc kimi iti ox ucluqları, tunc xəncər və gürz kimi silahlarla, zinət əşyaları ilə dəfn edildiyi məlum olub.
Arxeoloqlar belə qənaətə gəliblər ki, bunlar 4000 il əvvəl yaşamış Amazon qadınları ola bilər. Bu nəhəng qadınlar kişisiz cəmiyyətləri və döyüş meydanında, xüsusən də yay və oxda bacarıqları ilə məşhur idilər.
Tarixçi Bettani Hyuz nəşrə bildirib ki, bu, qədim Yunanıstanın mif və əfsanələrinin arxasında həqiqətin olduğunu göstərir:
“Sübutlar əvvəlki tapıntılarla əlaqələndirildikdə daha da vacib olduğunu göstərir. 2019-cu ildə Rusiyada ox və nizə ucları ilə basdırılmış dörd qadın döyüşçünün qalıqları tapılıb. 2017-ci ildə isə erməni arxeoloqları ayağında ox ucu ilə basdırıldığı üçün döyüş yaralarından ölmüş kimi görünən qadının qalıqlarını aşkar ediblər. 1990-cı illərin əvvəllərində Qazaxıstanla sərhəd yaxınlığında xəncərlə basdırılmış qadının qalıqları tapılıb”.
Hyuz qeyd edib ki, bəzi skeletlər qadınların yay və oxlardan geniş istifadə etdiyini göstərir:
“Oxlardan çox istifadə etdikləri üçün onların barmaqları əyri olur. Lakin barmaq oynaqlarında dəyişikliklər təkcə ov nəticəsində baş verməmişdir. Maraqlısı odur ki, sümüklərin çoxu yəhərdə uzun müddət qaldığını da açıq şəkildə göstərir. Skeletlərdə dişi çanaq sümüyü daha çox açıq olur, çünki onlar at miniblər. Onların sümükləri həyat tərzinə görə formalaşıb”.
Serialın epizodlardan biri olan “İpək Yolu və Qafqaz” dünyanın əsrlər boyu mədəniyyətlərin və sivilizasiyaların axışına şahidlik etmiş, ticarət yollarının Asiya və Avropa qitələri ilə bağlandığı bir hissəsinə yönəlib.
Tarixçi həmçinin Böyük Qafqazın, Avropanın ən hündür yaşayış məntəqəsi olan Xınalıq dağ kəndinə səfər edib.
“Kənd o qədər uzaqdır ki, zamanda itmiş hiss olunur. Yerli dil başqa heç bir yerdə danışılmır. Tunc dövründən bəri bura yaşayış məskəni olub. Kəndin 2000 əhalisindən bəziləri deyir ki, onların qadınları qədim zamanlarda yaylıqlı kişi qiyafəsində olub. Yerli sakinlər deyir ki, bütün nənələri döyüşüb. Bütün kişilər sürü ilə məşğul olub. Qadınlar döyüşərkən həmişə üzlərini örtüblər ki, insanlar onların qadın və ya kişi olduqlarını bilməsinlər”.
