Gürcüstan İrana görə sanksiyalara məruz qala bilər - SƏBƏB
Gürcüstan İrana rekord avtomobil ixracına görə sanksiyalarla üzləşə bilər.
"Bakupost" xəbər verir ki, buna səbəb Gürcüstanın altı ayda İrana avtomobil göndərişlərini min dəfə artırmasıdır.
Məlumata görə, Gürcüstan 2026-cı ilin birinci yarısında İrana 5000-dən çox minik avtomobili ixrac edib.
Gürcüstan Avtomobil İdxalçıları Assosiasiyasının rəhbəri Aleksey Noniadze bildirib ki, təkrar ixracın kəskin artması Qərbin Tbilisiyə qarşı sanksiyalarına səbəb ola bilər.
Noniadzenin sözlərinə görə, gürcü dilerləri İran bazarına genişmiqyaslı giriş planlaşdırmırdılar - təşəbbüs İran tərəfindən irəli sürülüb. Tələb, ehtimal ki, İranda nəqliyyat vasitələrinin çatışmazlığı ilə bağlıdır. Bunun da 90%-i Hörmüz boğazındakı hərbi vəziyyətlə əlaqədardır. Lakin onun fikrincə, İran etibarlı bazara çevrilməyəcək.
Qeyd edək ki, yanvar-iyun ayları arasında Gürcüstanın İrana ixracı 6 dəfə artaraq 106,9 milyon dollara çatıb və bu daşımaların əksəriyyətini minik avtomobilləri təşkil edib. İran Gürcüstan məhsulları üçün 9-cu ən böyük bazar olub.
Sanksiyalar təhlükəsi sektorun yeganə problemi deyil. İlin birinci yarısında Gürcüstandan avtomobillərin təkrar ixracı 23% azalaraq, 938 milyon dollara düşüb və ölkənin ümumi ixracındakı payı 37,7%-dən 24,2%-ə enib. Bu, hökumətin mart ayında altı ildən çox yaşı olan avtomobillərə idxal rüsumlarını təxminən altı dəfə artırmaq qərarı ilə bağlıdır.
Noniadze bildirib ki, dilerlərin 60-70%-i gözləmə rejimindədir və satış həcmi 50-60% azalıb. Gürcüstanın əsas avtomobil idxalı ABŞ, Yaponiya və Almaniyadan gəlir, 2025-ci ildə isə əsas təkrar ixrac istiqamətləri Qırğızıstan, Qazaxıstan və Azərbaycan olub.
