Trampın oğlu ABŞ hökumətini “opponentləri susdurmaqda” ittiham edib
ABŞ-ın keçmiş prezidenti Donald Trampın kiçik oğlu bildirib ki, amerikalılar “ayılana qədər” hakimiyyət opponentlərini susmağa və onları həbs etməyə məcbur etməyə davam edəcək.
Bizimyol.info xəbər verir ki, bu barədə siyasətçinin oğlu "Truth Social" sosial şəbəkəsindəki səhifəsində yazıb.O, Men ştatının ABŞ-ın keçmiş liderinin ştatda ilkin seçkilərində iştirakına icazə verməmək qərarını belə şərh edib: “İndi Donald Tramp Men ştatında seçki bülletenindən kənarda qalıb. Unutmayın ki, hakimiyyətdə olanlar nə qaydalara, nə ədəb-ərkana, nə də gücdən başqa bir şeyə əhəmiyyət vermirlər. Rəqiblərini nəyin bahasına olursa olsun susduracaq və ya həbs edəcəklər. Biz oyanana qədər heç nə onlara mane olmayacaq”, - deyə o qeyd edib.
Bir müddət əvvəl Men ştatının dövlət katibi Şanna Bellovs Trampın Men ştatında Respublikaçıların praymerizində iştirakına icazə verilməyəcəyini bildirmişdi.
Qərar Konstitusiyaya edilən 14-cü Düzəlişin 3-cü bölməsi ilə izah edilir ki, and içdikdən "sonra Birləşmiş Ştatlara qarşı üsyanda və qiyamda iştirak etmiş, eləcə də, onun düşmənlərinə yardım və ya himayə etmiş" heç bir şəxs Birləşmiş Ştatların hər hansı xüsusi Dövlətin xidmətində heç bir vəzifə tutmamalıdır.
Kolorado Ali Məhkəməsi daha əvvəl oxşar qərar vermişdi.
6 yanvar 2021-ci ildə o zaman Amerika lideri olan Trampın tərəfdarları 2020-ci ilin noyabrında keçirilən prezident seçkilərinin nəticələrinin təsdiqlənməsinin qarşısını almaq üçün ABŞ Konqresinin binasına soxulublar. Bina daxilində iğtişaşlar zamanı polis bir etirazçını güllələyib və öldürüb.
ABŞ-da növbəti prezident seçkiləri 2024-cü ilin noyabrında keçiriləcək. Aprelin 25-də Amerika lideri Co Bayden ən yüksək hökumət postuna yenidən seçilmək istəyəcəyini açıqladı. Tramp 2022-ci ilin noyabrında seçki yarışına qatılacağını elan etdi.
