Putinin YENİ PLANI: "Rusiya yalnız bu şərtlə müharibəni dayandıracaq"
“Trampın Rusiya-Ukrayna müharibəsinə dair atəşkəs planı ilk mərhələdə Putin tərəfindən dəstəklənsə də, indiki məqamda Moskvanın adekvat addım atmadığının şahidi oluruq.”
Bu fikirləri KONKRET.az-a açıqlamasında politoloq Aytən Qurbanova səsləndirib.
“Bunun bir neçə səbəbi ola bilər. İlkin olaraq onu qeyd etmək lazımdır ki, Putin Zelenski ilə müzakirələrin olmayacağına əmin idi. Hətta Trampın da bu əminliklə çıxış etməsinə nail olmuşdu. Sonra bu məsələyə dair ABŞ-ın mövqeyində qismən yumşalma hiss edildi. Eyni zamanda, Rusiyanın əsas hədəflərindən biri işğal etdiyi ərazilər üzərində nəzarəti tam təmin edəcək atəşkəsə nail olmaqdır. Belə ki, Kreml Ukraynanın qeyd-şərtsiz Kursk bölgəsindən çıxmasını da təmin etməyi hədəfləyir.”
Politoloqun sözlərinə görə, otuz günlük atəşkəs razılaşmasının Ukraynaya vaxt qazandıra biləcəyi bəhanəsi ilə Moskva hadisələri manipulyasiya edə bilər.
“Digər tərəfdən isə Putinin çıxışlarına nəzər yetirsək atəşkəsə nəzarət məsələsində ortaq razılıq əldə olunmadığını aydın şəkildə görə bilərik. Hər bir halda Rusiyanın əsas hədəfi Krımın işğalını legitimləşdirərək digər ərazilər üzərində tam nəzarətin təmin olunmasıdır. Putin məhz bu şərtlər altında müharibəni dayandırmağa razı ola bilər.“
