Avropa səfərbərliyə hazırlaşır: 300 minə qədər əsgər… – Hədəf bu ölkədir
“Avropa ölkələri icbari hərbi xidmətin bərpası imkanlarını müzakirə edir”.
Globalinfo.az xəbər verir ki, bu barədə Agence France-Presse (AFP) məlumat yayıb.
Qeyd olunub ki, səbəb iddia edilən Rusiya təhlükəsi və ABŞ-ın dəstəyi ilə bağlı qeyri-müəyyənliklərdir.
“Hərbi ekspertlər vurğulayırlar ki, Avropa İttifaqı (Aİ) ölkələrinin ABŞ-ın azalan dəstəyi kontekstində Rusiyaya qarşı effektiv mübarizə apara bilməsi üçün onlara 300 minə qədər yeni hərbçi lazım ola bilər. Fransa və Almaniya kimi ölkələrdə hərbi xidmətə çağırışın dəstəklənməsinə baxmayaraq, bir çox avropalı döyüşə hazır deyil. Xidmətin bərpasının siyasi və iqtisadi xərcləri NATO liderləri arasında şübhələr yaradıb. Onların əksəriyyəti məcburi hərbi xidməti geri qaytarmağı planlaşdırmır”, – deyə nəşr bildirib.
Məlumata görə, bəzi ölkələr, məsələn, Polşa döyüşçülərin hazırlanması üçün proqramlar yaratmağı düşünür:
“Fransa Prezidenti Emmanuel Makron Avropanın müdafiə qabiliyyətinin gücləndirilməsinin vacibliyini vurğulayaraq gəncləri könüllülük əsasında səfərbər etməyin yollarını axtarır. Bütövlükdə vəziyyət həm könüllüləri cəlb etmək üçün təbliğat kampaniyalarını, həm də milli təhlükəsizliyə yanaşmaların yenidən nəzərdən keçirilməsini tələb edir”.
