Ağ Evin qərarı rusları sevindirdi: Ukrayna son şansını itirə bilər
Rusiya qoşunlarının Suca şəhəri yaxınlığında Ukraynanın müdafiə xəttini yarmasından sonra Kiyevin Kursk əməliyyatı təhlükə altına düşüb. Bildirilib ki, vəziyyət daha da pisləşərsə, Ukrayna əsgərlərinə iki həftə ərzində Kursk vilayətini tərk etmək əmri verilə bilər.
ABŞ-ın Kiyevə kəşfiyyat məlumatlarının ötürülməsini dayandırması Ukrayna ordusuna ən ciddi zərbə kimi dəyərləndirilir. Belə ki, Rusiya qoşunlarının məhz bundan istifadə edərək Ukrayna Silahlı Qüvvələrinin müdafiəsini yarıb keçməyə çalışacağı qeyd olunur. Hazırda ruslar pilotsuz uçuş aparatları və bombalarla daha tez-tez zərbələr endirməyə başlayıblar.
Globalinfo.az-a danışan siyasi şərhçi Kənan Novruzov deyib ki, bu gün Ukrayna cəbhəsində hər iki tərəfin işi çətin olsa da, Rusiya taktiki üstünlüyə malikdir:
“ABŞ-da Donald Trampın hakimiyyətə gəlməsi mövcud duruma əsaslı təsir göstərməkdədir. Bir çoxu Trampın Rusiyanın “əlinə oynadığını” iddia edir. Vaşinqtonun Moskvaya da müəyyən təzyiq göstərməsinə baxmayaraq, əsas işi Kiyevlədir. Ukraynadan fərqli olaraq Rusiya ABŞ-la “dil tapana” oxşayır.
Kənan Novruzov
ABŞ-ın Ukraynaya kəşfiyyat məlumatlarını ötürməyi dayandırması və silah tədarükünü minimum səviyyəyə çatdırmasının Rusiyanın strateji üstünlüyü ələ alması ilə nəticələnməsi mümkündür. Görünən odur ki, Avropa Vaşinqtonun azaltdığı dəstəyi kompensasiya edə bilmir.
Kursk Ukrayna üçün çox əhəmiyyətlidir. Bu, Kiyevin danışıqlar masasından qismən uğurlu çıxması üçün son şansıdır. Rusiyanın Ukrayna qoşunlarını Kurskdan çıxarması, onun əlindəki son “kartını” da itirməsi mənasına gəlir. Trampın istədiyi də məhz budur. ABŞ lideri, “Ukrayna Prezidenti hələ danışıqlara hazır deyil, hazır olanda yenidən Ağ Evə gələcək” – sözləri ilə bəlkə də, məhz bunu, yəni Kiyevin daha ağır vəziyyətə düşməsini nəzərdə tuturdu. Hesab edirəm ki, qarşıdakı iki həftə həlledici ola bilər”.
Turan Rzayev
Globalinfo.az
