Yunanıstan "S-300" hava hücumundan müdafiə sistemini Ukraynaya vermək istəmir

Dünya

5-02-2024, 17:27 223

Afina "S-300" zenit-raket komplekslərini (SAM) Kiyevə vermək istəmir və buna səbəb olaraq öz ölkəsinin müdafiəsini riskə atmaq niyyətində olmadğını bildirib.

Bizimyol.info xəbər verir ki, bu barədə Yunanıstan hökumətinin rəsmi nümayəndəsi Pavlos Marinakis brifinqdə jurnalistlərə bildirib.

Nazirlər Kabinetinin nümayəndəsinə hökumətin "S-300"ləri Ukraynaya vermək niyyəti ilə bağlı sual verilib. Cavabında: “Demək lazımdır ki, yalan xəbərlərin, xüsusən də ölkənin müdafiəsi, xarici siyasəti və xaricdəki maraqları, xaricdəki imicimizlə bağlı olanda məhdudiyyət olmalıdır. Belə bir şey yoxdur ("S-300"ləri Ukraynaya vermək niyyəti), mən bunu qəti şəkildə inkar edirəm; hər halda, hökumətin müdafiə siyasətinin bir hissəsi kimi ölkənin müdafiəsini belə bir riskə atmaq niyyətimiz yoxdur. Ona görə də yazılanlar heç bir halda və heç bir mənada gerçək deyil”, - deyə Marinakis qeyd edib.
Bundan əvvəl Yunanıstan hökumətindəki mənbə jurnalistlərə bildirib ki, Afina Rusiya istehsalı olan hava hücumundan müdafiə sistemlərinin Kiyevə təhvil verilməsi və ya Rusiya silahlarının hər hansı digərləri ilə əvəzlənməsi məsələsi ilə bağlı qərar qəbul etməyib. Eyni zamanda mənbə Aİ-nin Kiyevə mütəşəkkil köməyinə istinad edərək bildirib ki, Yunanıstan bununla bağlı “Avropa çərçivəsində” hərəkət edir. Yunan tərəfi bu çərçivədən kənar heç bir qərar qəbul etməyib, “nə hava hücumundan müdafiə məsələsində, nə də Rusiya silahlarını başqaları ilə əvəz etmək”, - deyə hökumətdəki mənbə bildirib.
Yunanıstanın baş naziri Kiriakos Mitsotakis yanvarın 29-da telefon danışığı zamanı Ukrayna prezidenti Vladimir Zelenskini Yunanıstanın Kiyevə həm ikitərəfli əsasda, həm də Aİ və NATO çərçivəsində yardımını davam etdirəcəyinə inandırıb.
ABŞ dövlət katibi Antoni Blinken bundan əvvəl Mitsotakisə məktub göndərərək, Dövlət Departamentinin ABŞ-ın "F-35" qırıcıları və müvafiq avadanlıqların Yunanıstana 8,6 milyard dollara mümkün satışı ilə bağlı qərarını məlumatlandırıb.
O, Yunanıstanın Vaşinqtonun Afinaya 200 milyon dollar dəyərində əlavə yardım göstərmək imkanını araşdırması müqabilində Ukraynaya silah ötürməsini və ya satmasını təklif edib.