ABŞ Yəmənə yenidən zərbə endirib
ABŞ ordusu cümə günü Ənsar Allah hərəkatının husi üsyançılarının dörd pilotsuz uçuş aparatını hədəf alaraq Yəmənə yeni zərbə endirib.
BİA.az Bizimyol.info-a istinadən xəbər verir ki, bu barədə ABŞ Mərkəzi Komandanlığı (CENTCOM) məlumat yayıb.
“Səna vaxtı ilə təxminən 16:40-da CENTCOM qüvvələri buraxılmağa hazır olan dörd PUA-ya zərbələr endiriblər. ABŞ ordusu husilərin nəzarətində olan ərazilərdə dronları aşkar edərək, onların bölgədəki ticarət və ABŞ Hərbi Dəniz Qüvvələri gəmiləri üçün birbaşa təhlükə yaratdığını müəyyən edib. ABŞ Silahlı Qüvvələri zərbə endirib və özünümüdafiə məqsədilə PUA-nı məhv edib”, - deyə CENTCOM-un "X" sosial platformasındakı səhifəsində dərc etdiyi bəyanatda deyilir.
Bundan əlavə, komandanlıq göstərir ki, fevralın 2-də Amerika qoşunları Ədən körfəzi və Qırmızı dənizdə səkkiz pilotsuz təyyarəni vurub.
Qəzza zolağında qarşıdurmanın şiddətlənməsindən sonra Ənsar Allah hərəkatı bəyan edib ki, İsrail ərazisinə hücumlar həyata keçirəcək və Fələstin anklavında əməliyyat dayandırılana qədər onunla əlaqəli gəmilərin Qırmızı dəniz sularından, eləcə də, Bab əl-Məndeb boğazından keçməsinə icazə verməyəcək. 2023-cü ilin noyabr ayının ortalarından husilər Qırmızı dəniz və Ədən körfəzində onlarla mülki gəmiyə hücum edib.
Yanvarın 12-də Britaniya ilə ABŞ silahlı qüvvələri təyyarə, gəmi və sualtı qayıqlardan istifadə edərək Yəmənin bir sıra şəhərlərində, o cümlədən Səna və Hudeydada Ənsar Allah hədəflərinə ilk zərbələrini endiriblər. Hədəflər raketlərin və dronların yerləşdiyi yerlər, həmçinin üsyançıların radar stansiyaları olub. Yanvarın 23-nə keçən gecə Böyük Britaniya və ABŞ, əsas hədəfləri yeraltı Husi anbarları, raket buraxılışı və havadan müşahidə ilə əlaqəli obyektlər olan ikinci rəsmi təsdiqlənmiş birgə zərbələr seriyasını həyata keçirdilər.
