Rusiya, İran və Qazaxıstan arasında kommunikasiya xəttinin yaradılması ilə bağlı danışıqlar aparacaq
Rusiya, İran və Qazaxıstanın nümayəndələri fevralın 15-20-də Moskvada üç ölkə arasında fiber-optik rabitə xəttinin çəkilməsi ilə bağlı danışıqlar aparacaqlar.
Bizimyol.info xəbər verir ki, bu barədə Qazaxıstanın rəqəmsal inkişaf, innovasiya və aerokosmik sənaye naziri Bağdat Musin İran nümayəndələri ilə danışıqlardan sonra bildirib.
“Bəli, biz bu layihənin çox vacib olduğu barədə ümumi anlaşma əldə etdik və onların (İran) da bu layihədə marağı var. Danışıqların növbəti mərhələsi daha konkret olacaq və görüş Rusiya Federasiyasında təşkil olunacaq, həmçinin, biz konkret tarixləri razılaşdırdıq, tədbirin fevralın 15-20-də Moskvada keçirilməsi planlaşdırılır”, - deyə Musin brifinqdə jurnalistlərin sualını cavablandırarkən qeyd edib. Musinin sözlərinə görə, bu, bir infrastruktur layihəsidir, bu cür layihələr çox vaxt aparır və müxtəlif mərhələlərdən keçir.
“Biz şimaldan cənuba və cənubdan şimala nəqliyyatın tranzitini yaxşılaşdırmağa kömək edəcək hər hansı qarşılıqlı əlaqədən tamamilə razıyıq, xüsusən də Qazaxıstan coğrafi cəhətdən elə bir yerdə yerləşdiyinə görə, bu marşrut vasitəsilə biz nəinki məlumatı şimaldan cənuba və cənubdan şimala, həm də Çindən cənuba və cənubdan Avropaya ötürə bilərik” - deyə Musin qeyd edib.
Bundan əvvəl Rusiya, Qazaxıstan və İran arasında fiber-optik rabitə xəttinin çəkilməsi layihəsini Qazaxıstan prezidenti Kasım-Comart Tokayev təklif etmişdi. Qazaxıstan liderinin sözlərinə görə, bu, Avrasiya məkanında tranzit daşımaları üçün alternativ marşrut yaratmaqla yanaşı, qlobal səviyyədə data logistikasında Avrasiya İqtisadi İttifaqının mövqeyini əhəmiyyətli dərəcədə gücləndirəcək.
