İsrail HƏMAS-ın yaradılmasını maliyyələşdirib - Borrell
Avropa İttifaqının xarici işlər və təhlükəsizlik siyasəti üzrə ali nümayəndəsi Cozep Borrel İsraili Fələstinin HƏMAS terror qruplaşmasının yaradılmasını maliyyələşdirməkdə ittiham edib.
Bizimyol.info xəbər verir ki, "Reuters"in verdiyi məlumata görə, o, bu barədə İspaniyanın Valyadolid Universitetində çıxışı zamanı deyib. Diplomat izah edib ki, bu yolla Təl-Əviv Fələstinin Milli Azadlıq Hərəkatının rəhbərlik etdiyi o vaxtkı Fələstin administrasiyasını zəiflətməyə çalışıb.Borelin sözlərinə görə, regionda münaqişənin həlli üçün yeganə sülh yolu ayrıca Fələstin dövlətinin yaradılmasıdır, lakin İsrail mənfi variantda israrlıdır: “İsrail mənfilikdə israr etsə də, biz yalnız kənardan tətbiq edilən iki dövlətli həllin sülh gətirəcəyinə inanırıq”, - deyə o qeyd edib.
Məlum olduğu kimi, İsrail hakimiyyətinin əleyhdarları və bəzi dünya mediaları uzun müddətdir Təl-Əvivi HƏMAS-a dəstək verməkdə ittiham edirlər. Eyni zamanda, İsrailin baş naziri Benyamin Netanyahu bu ittihamları dəfələrlə rədd edib.
Bundan əvvəl İsrail Müdafiə Qüvvələri Qəzzanın şimalında döyüşlərin əsas mərhələsinin başa çatdığını, indi növbənin mərkəzə və cənuba çatdığını bildirmişdi. İsrail Müdafiə Qüvvələri bildirib ki, hərbçilər “Həmas”ın Qəzza zolağının şimalındakı hərbi strukturunun sökülməsini başa çatdırıblar.
Bu arada Haaqa Beynəlxalq Məhkəməsi İsrail əleyhinə dinləmələrə başlayıb. İddiaçı Cənubi Afrika olub. Onlar İsraili fələstinlilərin soyqırımında ittiham edir.
