Nobel mükafatı laureatı: “Rusiyanı BMT Təhlükəsizlik Şurasından xaric edin”
Nobel Sülh Mükafatı almış “Vətəndaş Azadlıqları Mərkəzi”nin rəhbəri Aleksandra Matviyçuk Rusiyanın BMT Təhlükəsizlik Şurasından çıxarılmalı, Vladimir Putinin isə məsuliyyətə cəlb edilməsi üçün beynəlxalq tribunal qurulmalı olduğunu düşünür.
Musavat.com xarici agentliklərə istinadən xəbər verir ki, bu barədə o, Facebook səhifəsində yazıb.
“İndi ancaq ordular danışır, çünki əvvəllər bizim regionda hüquq müdafiəçilərinin səsi eşidilmədi. Qaydaların, qanunun aliliyinin deyil, ən güclü hərbi imkanlara malik olanın hakim olduğu bir dünyada yaşamaq istəmiriksə, bu vəziyyət dəyişməli olacaq”,-deyə o yazıb.
Matviyçukun sözlərinə görə, BMT və iştirakçı dövlətlər hərbi bloklarda iştirak edib etməməsindən asılı olmayaraq beynəlxalq sülh və təhlükəsizlik sahəsində islahatlar aparmalıdırlar.
Laureatın fikrincə, ilk növbədə Rusiya BMT Nizamnaməsini sistematik şəkildə pozduğu üçün BMT Təhlükəsizlik Şurasından xaric edilməlidir.
“BMT və iştirakçı dövlətlər “məsuliyyət boşluğu” problemini həll etməli və müharibə cinayətlərinin qurbanı olan yüz minlərlə insan üçün ədalət şansı verməlidir... Beynəlxalq tribunal yaradılmalı Putin, Lukaşenko və digər digərləri məsuliyyətə cəlb edilməlidir”,-deyə o qeyd edib.
