Qarabağ üzrə Ekologiya və Təbii Sərvətlər İdarəsi təsis edilib
“Ətraf mühit nöqteyi-nəzərindən işğaldan azad edilən ərazilərdə vəziyyət elə də ürəkaçan deyil. Olduğumuz ərazilərdə demək olar ki, meşə ərazisi, eləcə də ağaclar qalmayıb”.
“Report” xəbər verir ki, bunu Dövlət Ekoloji Təhlükəsizlik Xidmətinin rəisi Hikmət Əlizadə deyib.
Nazirlik rəsmisi qeyd edib ki, həmin ərazilərdə bütün ağaclar kəsilərək ya odun kimi istifadə olunub, ya da mebel üçün fabriklərə daşınıb:
“Bu səbəbdən işğaldan azad edilən ərazilərdə uzun müddətli işlərə ehtiyac var. Nazirlik olaraq artıq qiymətləndirmə işlərinə başlanılıb. Həmçinin Qarabağ bölgəsini əhatə edən 12 saylı Ekologiya və Təbii Sərvətlər İdarəsi təsis edilib. Hələlik işçi məhdud saydadır. Çünki məlum səbəblərdən həmin ərazilərdə hərəkət məhdudiyyəti var. Bu gün üçün həm müvafiq qiymətləndirmə işləri aparılır, həm də paralel olaraq mümkün olan ağacların əkilməsi həyata keçirilir. Xüsusilə də çinar ağacı və palıd toxumlarının səpilməsi prosesi gedir. Bir sözlə, həmin ərazilərdə hər gün davamlı şəkildə proseslər gedir və yaxın gələcəkdə genişmiqyaslı tədbirlər görüləcək”.
