Ermənistan bu addıma getsə, Azərbaycan müharibəyə başlayacaq – İrəvan həyəcan içində
Rusiya Baş nazirinin müavini Aleksey Overçuk bildirib ki, Ermənistan 10 noyabrda imzalanan üçtərəfli bəyannamədən rəsmən öz imzasını geri götürməyib.
Bəzi ekspertlərin fikrinə görə, Ermənistanın 10 noyabr bəyanatından çıxması Azərbaycanın İrəvana qarşı müharibəyə başlaması üçün legitim əsas olacaq. Artıq bu barədə Ermənistanda narahatlıqlar var.
Həqiqətən də Paşinyan üçlü bəyanatdan imtina edə bilərmi?
Globalinfo.az-a danışan politoloq Fərhad Məmmədov deyib ki, üçtərəfli bəyanatın Azərbaycan üçün üç əsas bəndi var:
“Birincisi bəyanatda yer alan maddələrin bir neçəsində Ermənistan işğalçı qüvvələrinin Azərbaycan ərazilərindən çıxarılması qeyd edilib. Ermənistan Baş naziri Nikol Paşinyanın sənədə imza atması birbaşa Ermənistanın ərazilərimizi işğal etməsinin etirafıdır. İkincisi, Zəngəzur dəhlizinin açılmasının Ermənistan rəhbərliyi tərəfindən təmin edilməsi, üçüncüsü isə Rusiya sülhmərmalılarının Azərbaycan ərazilərindən 5 ildən sonra çıxarılması idi. Rus sülhməramlı kontingenti vaxtından əvvəl ərazilərimizdən çıxdığı üçün artıq bu maddə aktuallığını itirib.
Fərhad Məmmədov
Naxçıvana gedən maneəsiz yolun təmin edilməsi üçün Ermənistan üzərinə götürdüyü öhdəlikləri yerinə yetirməlidir. Eyni zamanda işğalçılıq siyasətini etiraf etməlidir”.
Politoloqun sözlərinə görə, Ermənistan bu öhdəliklərini yerinə yetirsə, konstitusiyasında dəyişiklik edərək Azərbaycana ərazi iddiasından əl çəkərsə, sülh müqaviləsi imzalana bilər:
“Ermənistanda üçtərəfli bəyanatdan çıxmaqla bağlı fikirlər var. Lakin Nikol Paşinyan bu addımı həyata keçirməyəcək. Çünki bunun yaxın gələcəkdə çox ciddi fəsadları ola bilər. Sülh sazişini imzalamadan 10 noyabr bəyanatından çıxarsa, rəsmi İrəvan böyük problemlərlə qarşılaşacaq. 44 günlük Vətən müharibəsinin nəticələrini birtərəfli şəkildə ləğv edəcəklərsə, bu, Azərbaycan üçün siqnal olacaq ki, Ermənistandakı revanşist hakimiyyətə qarşı əməliyyat həyata keçirsin”.
