Səttar Möhbalıyev istefa verdi - Konfederasiyanın yeni sədri o SEÇİLDİ
Azərbaycan Həmkarlar İttifaqları Konfederasiyasının (AHİK) yeni sədri vəzifəsinə Sahib Məmmədov seçilib.
Modern.az xəbər verir ki, bununla bağlı məsələ AHİK-in avqustun 26-da keçirilən növbədənkənar VII qurultayının gündəliyinə daxil edilib.
Səttar Suliddin oğlu Möhbalıyevin sentyabrın 1-nə təyin edilmiş növbədənkənar parlament seçkilərində iştirakı ilə bağlı vaxt çatışmazlığı səbəbindən AHİK-in sədri vəzifəsindən istefası məsələsi qəbul edilib və qurultay iştirakçıları bu vəzifəyə Sahib Əli oğlu Məmmədovun namizədliyinə yekdilliklə səs veriblər.
Qeyd edək ki, Sahib Əli oğlu Məmmədov 1978-ci ildə anadan olub və Kiyev Dövlət Universitetinin Beynəlxalq hüquq fakültəsini bitirib. 2014-cü ildən İqtisadiyyat Nazirliyində çalışan Sahib Məmmədov Azərbaycan Respublikası Prezidentinin 2021-ci il 23 dekabr tarixli Sərəncamı ilə iqtisadiyyat nazirinin müavini təyin edilib. "Dövlət qulluğunda fərqlənməyə görə" və "Tərəqqi" medalları ilə təltif olunub.
***
11:31
Avqustun 26-da Azərbaycan Həmkarlar İttifaqları Konfederasiyasının (AHİK) növbədənkənar VII Qurultayı keçirilir.
Modern.az xəbər verir ki, qurultayın gündəliyindəki əsas məsələ Azərbaycan Həmkarlar İttifaqları Konfederasiyasının yeni sədrinin seçilməsidir.
Qeyd edək ki, 26 sahə həmkarlar ittifaqı birliklərinin könüllü ittifaqı olan AHİK-in 1 milyon 500 min üzvü var. Təşkilatın indiyədək altı qurultayı keçirilib.
Qurultayda hər üzv təşkilatdan 5 nəfər iştirak edir.
Əldə etdiyimiz məlumata görə, Konfederasiyanın sədri postuna namizədlər arasında qurumun hazırkı sədri Səttar Möhbalıyev yoxdur. O, 1993-cü ilin 6 fevral tarixində Azərbaycan Həmkarlar İttifaqları Konfederasiyasının sədri seçilib və bu günə kimi bu vəzifədə çalışıb.
