Putin çətin durumda – Ümid Bakıya qalıb
“Rusiya ilə Ukrayna arasındakı müharibənin gedişatı, Kiyevin son irəliləyişləri, ərazilərin tutulması, neftayırma zavodlarının bombalanması Prezident Vladimir Putinin alternativ yollar haqda danışmaq üçün Bakıya səfərə vadar etdi”.
Globalinfo.az xəbər verir ki, bu iddia ilə Türkiyə və Qafqaz məsələləri üzrə iranlı siyasi analitik Həsən Sadiqyan çıxış edib.
Onun sözlərinə görə, Bakıda ilk gündəmə gətirilən məsələ Zəngəzur dəhlizinin açılması olub:
“O yol Orta Dəhlizin bir hissəsidir. Rusiya nəzarətin özündə olması ilə dəhlizin açılmasını istəyir. Çünki Zəngəzur dəhlizi enerjinin ötürülməsi və bir çox istiqamətlərdə tərəflər qədər Moskvaya da iqtisadi üstünlük qazandıra bilər. Bakı Kremlin necə bir böhranlı vəziyyətdə olduğundan xəbərdardır və bundan məharətlə istifadə edə bilər. Hazırda regionda güclü olan Azərbaycandır, bu səbəblə Rusiya onunla yaxınlaşaraq bölgəyə yenidən qayıtmağa çalışır. Onun üçün Bakı və İrəvan arasında sülhün əldə olunması üçün vasitəçilik rolunu gündəmə gətirir. Son olaraq Ukraynanın Rusiyanın daxilinə doğru irəliləməsi, Ermənistanın ondan uzaqlaşaraq Qərbə yönəlməsi Moskvanın təhlükəsizliklə bağlı narahatlıqlarını artırıb. Azərbaycan yeganə ölkələrdəndir ki, Şərqlə Qərb arasında balanslı münasibət saxlamağa çalışır. Bu vəziyyət Bakının Moskva üçün əhəmiyyətini də artırır. Odur ki, təhlükəsizlik yanaşmasını qoruması üçün Azərbaycanla münasibətlərin möhkəmləndirilməsi və dərinləşdirilməsi Rusiyanın xarici siyasətinin prioritetidir”.
Politoloq Rusiyanın iqtisadi baxımdan çətin vəziyyətdə olduğunu bildirib:
“Moskvanın digər problemi iqtisadiyyat və enerji transferi ilə bağlıdır. Ukrayna müharibəsinə görə sanksiyalar altındadır. Praktiki olaraq Avropa ilə iqtisadi əlaqələr qura və mal mübadiləsi apara bilmir.Ona görə də Şimal-Cənub nəqliyyat dəhlizinin Azərbaycan və İran vasitəsilə Asiya bazarlarına çıxış imkanlarının genişləndirilməsi və asanlaşdırılması onun üçün yeganə yoldur. Vladimir Putin Azərbaycan vasitəsi ilə buna çalışır. Müharibəyə görə Rusiya Avropaya böyük həcmdə qaz sata bilmir. Xüsusilə son olaraq Ukrayna ordusunun Kurska hücumu, Sucada qazpaylayıcı stansiyaya nəzarəti Moskva üçün məsələni çətinləşdirib. Ona görə də Putin Azərbaycanın köməyi ilə bu məsələni həll etməyə çalışır”.
Qeyd edək ki, rəsmi Bakı bu haqda hələlik yekun qərar verməyib. Çünki hazırda ağır sanksiyalar altında olan Russiyanın bu istəyinə müsbət cavab vermək Azərbaycan üçün riskli sayılır. İddialara görə, Putin Əliyevdən ona kömək göstərməyi xahiş edib.
