Təhlükə var: İran birbaşa raket zərbəsi endirə bilər
“İran-İsrail müharibəsi bitməyib, proses davam edir. Ümumiyyətlə, münaqişənin bitməsi yönündə fikir söyləmək sadəlövhlükdür”.
Bu sözləri Globalinfo.az-a Orta Doğu Araşdırmalar Mərkəzinin rəhbəri, politoloq Sədrəddin Soltan İran-İsrail gərginliyinin hazırkı mərhələsi haqda danışarkən deyib.
Onun sözlərnə görə, İran İsrailə birbaşa müdaxilədən çəkinməyə çalışır:
“Müqayisə üçün deyim ki, bu müharibə faktiki olaraq keçən əsrdə SSRİ ilə ABŞ arasında Əfqanıstanda, Vyetnamda, Koreyada və Kubada olanları xatırladır. Hazırda Tehran “Hizbullah”, HƏMAS, Husilər, Həşdi-Şabi və digər qruplaşmalar vasitəsilə Təl-Əvivə qarşı müharibə aparır.
İranın İsrailə birbaşa zərbə vurma ehtimalı çox azdır. Rəsmi Tehran belə bir addım atarsa, bu, onun üçün fəlakətlə nəticələnə bilər. İran hakimiyyəti də vəziyyətin fərqindədir. Hesab edirəm ki, İsrailə HƏMAS lideri İsmayıl Haniyənin ölümü ilə bağlı cavab tədbirlərini yubandırılması bu risklə bağlıdır”.
Sədrəddin Soltan
Politoloq bildirib ki, Tehranda Təl-Əvivə qarşı birmənalı fikir yoxdur:
“Bu gün “Hizbullah”, HƏMAS və SEPAH-ın komandirləri öldürülür. Fikrimcə, HƏMAS və “Hizbullah” İsrailə qarşı İranın tapşırığı ilə qarşıdurma içərisindədir. Yeni müdafiə naziri cavab tədbirinin görüləcəyini desə də, bunun necə olacağı məlum deyil. Bütün hallarda ABŞ və müttəfiqləri İranın belə bir ağılsız addım atacağına ümid etmirlər. Digər tərəfdən, hakimiyyət müharibəni davam etdirmək istəsə, bunun nəticəsi fəlakət ola bilər. Hətta hökumət daxilində üsyan olması da istisna deyil.
İran-İsrail müharibəsi təhlükəsi aradan qalxmayıb. İran son addımda İsrailə hücum edə bilər. Söhbət birbaşa raket zərbələrindən gedir. Tehranın ABŞ obyektlərini hədəf alması gözləniləndir”.
