Bakını İrəvandakı türklərin əli ilə vurmaq – Paşinyanın hiyləgər planı
Türkiyəli jurnalistlərin Ermənistana gəlişi və ölkənin baş naziri Nikol Paşinyandan müsahibə alması maraq doğurub. Xüsusilə media nümayəndələrinin Ermənistanın təşəbbüsü və dövlət büdcəsindən ayrılan vəsait hesabına səfər etməsi diqqət çəkib.
Globalinfo.az-a danışan siyasi şərhçi Asif Nərimanlı deyib ki, burada əsas maraqlı tərəf İrəvandır:
“Görünür, Ankara-İrəvan danışıqlarında Ermənistan belə bir istək irəli sürüb, Türkiyə də “yox” deməyib. Paşinyan bununla “sülhpərvər” mövqeyini, münasibətlərin normallaşmasında nə qədər maraqlı olduğunu sərgiləyir. O, həm də Türkiyə ictimaiyyətində müsbət imic yaratmağa çalışır. Məqsəd isə bəllidir: Türkiyə ilə münasibətlər ilkin şərt olmadan, yəni Azərbaycanın maraqları, istəkləri nəzərə alınmadan qurulmalıdır. Rəsmi Ankara bunu qəbul etməsə də, ölkə daxilində Azərbaycansız Ermənistanla münasibətlərin qurulması, sərhədlərin açılmasını istəyən qruplar var”.
Asif Nərimanlı
Ekspert bildirib ki, Paşinyan son müsahibə addımı ilə Türkiyə ictimaiyyətindəki bu qrupların mövqelərini gücləndirməyə çalışır:
“Ancaq Türkiyənin Azərbaycansız Ermənistanla münasibətləri quracağı, sərhədləri açacağı ehtimalı görünmür. Bu, Azərbaycan xalqının Türkiyəyə olan inamını zədələyə bilər. Ankara İrəvan naminə Bakını itirmək niyyətində deyil. Digər tərəfdən Azərbaycanın Ermənistanla sülh danışıqlarında irəli sürdüyü tələblər həm də Türkiyənin maraqları və strateji hədəfləri yönündədir. Rəsmi və qeyri-rəsmi görüşlər baş tutsa belə, Ankara və Bakının gündəliyi eyni olaraq qalır”.
