TƏCİLİ! Siyasi xaos böyüyür, gərginlik pik həddə çatır - İngiltərədə nə baş verir?
İngiltərədə daxili işlər nazirinin qəfil istefası və İcmalar Palatasında səsvermə zamanı qəzəbli çıxışlardan sonra baş nazir Liz Trassın siyasi taleyi daha da qeyri-müəyyənləşib. Bəs Liz Truss bundan sonra nə edəcək?
İngiltərədə hökuməti əhatə edən böhran böyüyür. Bu xaosu idarə etmək, demək olar ki, mümkünsüz görünür.Musavat.com-un BBC-nin Siyasət Redaktoru Kris Meysonun məqaləsinə istinadən məlumatına görə, belə bir hiss var ki, siyasi arenada hər an hər şey çökə bilər.
“Hökumətin fəaliyyət göstərmədiyi çox aydındır. Mühafizəkarların hiss etdiyi şiddətli qəzəb də sülhə imkan vermir. Baş nazir (Liz Trass) hökumət proqramını puç etdi və bir ay ərzində maliyyə nazirini işdən çıxardı, bir gündə həm daxili işlər nazirini, həm də baş müşaviri itirdi, komandası isə partiyadakı iki yüksək səviyyəli siyasətçinin hələ də vəzifədə olub-olmaması sualına saatlarla cavab verə bilmədi” - məqalədə deyilir.
Meyson qeyd edir ki, zəif hakimiyyət adi səsverməni güc nümayişinə çevirməyə çalışıb:
“Nazirlər aşağılandı, deputatlar çaş-baş qaldı. Nə Baş Nazirlik, nə də yüksək səviyyəli nazirlər Mühafizəkarlar Partiyasının partiya nizam-intizamına cavabdeh müavininin hələ də vəzifədə olub-olmaması sualına cavab verə bilməyiblər. Mühafizəkar deputatlar gördüklərinə inana bilmirlər. Mən Mühafizəkarlar Partiyasının çox yüksək səviyyəli siyasətçisi ilə danışdım. Onun təhlili o qədər sərt idi ki, ağzım açıq qaldı. O, Liz Trassın hərəkətlərini “bağışlanmayan, fəlakətli və dəhşətli” adlandırdı. Həmin şəxs dedi ki, bu, həm partiyanı, həm də ölkəni bezdirib və sonda ümumi seçkiyə gətirib çıxaracaq. Onun səlahiyyəti olmadan necə diktator kimi davrana bilər?”
Bəs Britaniyanın yeni baş naziri bundan sonra nə edə bilər?
BBC-nin Siyasət Redaktoru Kris Meyson yazır ki, Liz Trassın qarşısında 3 seçim var...
1. Səhər oyandıqdan sonra məğlubiyyətini etiraf edə bilər.
2. Onun partiyası indi yolun sonuna gəldiyini etiraf edə bilər. Çünki mühafizəkarlar arasında narazılıq pik həddə çatıb.
3. Ya da heç nə olmamış kimi yoluna davam etməyə çalışa bilər.
“Hələ də onu dəstəkləyənlər başqa baş nazir tapmağın çətin olduğunu vurğulayır və yeni baş nazir tapılsa belə, baş nazirlərin bu qədər tez-tez dəyişdirilməsinin ictimaiyyətə absurd görünəcəyini deyirlər. Bu səbəbdən növbədənkənar seçki çağırışları qarşısıalınmaz olar. Hazırda səsvermədə xeyli geridə olan Mühafizəkarlar Partiyasının deputatları niyə indi seçkiyə gedib öz yerlərini itirmək riski ilə üzləşsinlər? Amma yeni hökumətin gözlənilən ömrü günü-gündən qısalır. Xaos arta bilər” - Meyson yazır.
