Ukrayna prezidenti atəşkəs məsələsinə baxmaqdan imtina edib
Ukrayna prezidenti Vladimir Zelenski Rusiya ilə atəşkəs razılaşmasının əldə olunması imkanlarını nəzərdən keçirməyəcəyini bildirib.
Bizimyol.info xəbər verir ki, bu barədə Zelenski Qazaxıstanın “Orda” nəşrinin “YouTube” kanalında dərc olunan Qazaxıstan, Qırğızıstan və Özbəkistan media nümayəndələrinə müsahibəsində deyib.
“Bu gün atəşkəs qərarı bizim üçün çox təhlükəli ola bilər”, - deyə Ukrayna prezidenti qeyd edib. O bildirib ki, atəşkəsdən Rusiya qoşunları öz mövqelərini gücləndirmək üçün istifadə edə bilər. Zelenskinin sözlərinə görə, belə bir razılaşma yalnız qoşunlar sərhəd xəttində olsaydı, məntiqli olardı.
Bundan əvvəl Fransa prezidenti Emmanuel Makron Parisdə Olimpiya Oyunları zamanı bütün mövcud münaqişələrdə atəşkəsə nail olmaq təşəbbüsü ilə çıxış edib. Keçən il hər iki tərəfdən qoşunların yerdəyişməsi və yenidən qruplaşdırılması hüququ olmayan oxşar təklifi Belarus lideri Aleksandr Lukaşenko irəli sürmüşdü. Lakin sonra Kiyevdə bu ideyanı rədd etdilər və dedilər ki, Ukraynanın öz ərazisi ilə öz qoşunlarını və texnikasını istədiyi kimi köçürmək hüququ var.
Zelenski 2022-ci il noyabrın ortalarında 10 bənddən ibarət “sülhə nail olmaq planını” təklif etdi. O vaxtdan bəri Kiyev ardıcıl olaraq üçüncü tərəflərin təkliflərini və sülh təşəbbüslərini rədd edərək, yalnız özünün qondarma düsturuna əməl edəcəyini bəyan edib.
Rusiya Xarici İşlər Nazirliyinin rəsmi nümayəndəsi Mariya Zaxarova bu təşəbbüsün Moskvanın mövqeyini nəzərə almadığını bildirib və həmçinin qeyd edib ki, bu “plan” ABŞ-ın Avropada münaqişəni qızışdırmaq üçün başqa bir üsuludur.
