Paşinyan hansı qüvvələrə arxalana bilər? - GƏLİŞMƏ
"Ermənistanın baş naziri Nikol Paşinyanın 4 kəndin Azərbaycana geri qaytarılması ilə bağlı son açıqlamaları Kremlin narahatlığına səbəb olub. Rusiyalı rəsmilərin və deputatların İrəvan əleyhinə açıqlamaları artıb".
Bunu "Sherg.az"a açıqlamasında politoloq Elxan Şahinoğlu deyib.
Ekspert bildirib ki, Rusiya prezidenti Vladimir Putin Paşinyanı bugünə qədər ona görə tənqid edir ki, məhz Ermənistanın baş naziri Azərbaycanın ərazi bütövlüyünü tanımaqla Qarabağın “itirilməsinə” şərait yaratdı:
"Yəni Kreml sahibinin sözlərindən çıxan nəticə budur ki, Paşinyan Qarabağı Azərbaycan ərazisi tanımaqla səhvə yol verib. Rusiya rəsmiləri bu dəfə də Paşinyanı 4 kəndi Azərbaycana qaytarmasına hazırlaşmasına görə tənqid edirlər. Onlar hesab edirlər ki, həmin kəndlərin Azərbaycana qaytarılması Ermənistanın kommunikasiya xətlərinin təhlükə altına keçməsinə şərait yaradacaq. Halbuki, Ermənistanla Azərbaycan arasında sülh sazişi imzalanarsa, Ermənistanın kommunikasiya xətlərinə heç bir təhlükə olmayacaq. Sülh sazişi kommunikasiya xətlərinin təhlükəsizliyinin təminatçısı olacaq. Kreml Rusiyanın vasitəçiliyi olmadan Azərbaycanla Ermənistan arasında danışıqlar aparılmasının da əleyhinədir. Nə Bakının, nə də İrəvanın Rusiyanın və digər dövlətlərin timsalında vasitəçiyə ehtiyacı var. Birbaşa əlaqə müsbət nəticələr verir".
Analitik vurğulayıb ki, Ermənistanın baş naziri Nikol Paşinyana qarşı faktiki 4 qüvvə - Kreml, Qarabağ klanının simasında erməni müxalifəti, Qarabağ separatçılarının tör-töküntüləri və kilsə birləşib:
"Paşinyanın 4 kəndi Azərbaycana geri qaytarması qərarı bu qüvvələri radikallaşdırmaqla yanaşı hökumətə qarşı aralarında qeyri-rəsmi ittifaqı gücləndirəcək. Belə olan halda Paşinyan hansı qüvvələrə arxalana bilər? Ermənistan ordusu hələ ki, siyasətə qarışmır və komandanlıq Paşinyana tabedir. Ancaq Paşinyan özünün də əvvəllər səylədiyi kimi orduda “5-ci kolonun” varlığından narahatdır. Ona görə Paşinyan etibar etmədiyi generalları ordudan uzaqlaşdırmaqda davam edəcək. Digər tərəfdən ABŞ Mərkəzi Kəşfiyyat İdarəsi də Nikol Paşinyanı qoruyur. Ancaq bu amillər Paşinyanı çevriliş və qiyam təhlükəsindən tam sığortalamır. Ermənistan hökumətinin Azərbaycan və Türkiyə ilə əldə edəcəyi sülh və sonrakı mərhələdə regional əməkdaşlığa qoşulması imkanları Nikol Paşinyan üçün ən vacib təhlükəsizlik təminatına çevriləcək. Əlbəttə, Qarabağ klanı, daşnaklar və kilsə sülhlə barışmayacaqlar, ancaq regional əməkdaşlıq onların müqavimət gücünü azaldacaq. Bu prosesdə Bakı ilə Ankaranın Nikol Paşinyanı sülhə və və gələcək əməkdaşlığa, o cümlədən prezident İlham Əliyevin “Qafqaz evi” ideyasına təşviq etməsi əhəmiyyətli rol oynayacaq".
