Ramasvami: "Bayden ABŞ prezidentliyinə namizəd olmayacaq"
"Seçki yarışında iştirak edən ABŞ prezidenti Co Bayden məxfi sənədlərin düzgün saxlanmaması ilə bağlı istintaqın başa çatması fonunda Demokratlar Partiyası seçkilərində namizəd ola bilməyəcək".
Bizimyol.info xəbər verir ki, daha əvvəl yarışdan çıxdığını elan edən amerikalı iş adamı Vivek Ramasvami: "Baydenin əvəzinə ABŞ-ın keçmiş birinci xanımı Mişel Obama Demokratik seçki prosesinin əsas iştirakçısına çevrilə bilər", - deyib.
"Bayden Demokratların namizədi olmayacaq. Mişel Obamanı qarşılamağa hazır olun", - deyə siyasətçi "X"sosial şəbəkəsində (keçmiş "Twitter") yazıb. O, həmçinin "Fox News"a verdiyi müsahibədən bir fraqment yerləşdirib və bu zaman həmin fikrini təsdiqləyib. “Bayden namizəd olmayacaq. Keçən il bu barədə danışdım, amma insanlar mənə sui-qəsd nəzəriyyəçisi olduğumu söylədilər və indi bu, getdikcə daha aydın görünür”, - deyə Ramasvami qeyd edib.
Siyasətçi izah etdi ki, ABŞ Ədliyyə Departamenti Baydenin sənədlərlə işləməsinə dair hesabat yayıb və məhz bu fakt “Ağ Evin hazırkı sahibinin prezidentliyə namizəd olmasına mane olur”. Ramasvaminin sözlərinə görə, Demokratik Partiya Baydeni seçkilərdə iştirakdan “çıxartmağı” və başqa namizəd tapmağı planlaşdırır.
Fevralın 8-də xüsusi prokuror Robert Huhr başa çatmış istintaqın nəticələrinə əsasən, ABŞ prezidentinin məxfi sənədləri “qəsdən saxladığına” dair sübutlara baxmayaraq, Baydenə qarşı ittiham irəli sürməmək qərarına gəlib.
2023-cü ilin yanvarında məlum oldu ki, Baydenlə əlaqəli Vaşinqton beyin mərkəzinin binasında bir qrup məxfi sənədlər tapılıb. Onlar siyasətçinin ABŞ-ın vitse-prezidenti vəzifəsində çalışdığı dövrə (2009-2017) aiddir. Ağ Evin məlumatına görə, sənədlər 2022-ci ilin noyabrında dövlət başçısının vəkilləri tərəfindən aşkar edilib. Sənədlər Baydenin 2017-2019-cu illərdə, yəni prezidentliyə namizədliyini elan edənə qədər istifadə etdiyi ofis məkanında olub. Oxşar sənədlər daha sonra Baydenin Delaver ştatının Vilmington şəhərindəki evində tapılıb.
Keçmiş prezident Donald Trampa qarşı daha əvvəl məxfi sənədlərin düzgün saxlanmaması ilə bağlı iş açılmışdı. Ona qarşı ittiham irəli sürülüb və məhkəməsi mayın 20-nə təyin edilib.
