Arnold Şvartsenegger saatına görə hava limanında saxlanılıb
Arnold Şvartsenegger, iqlim böhranı ilə mübarizə xeyriyyə təşkilatına kömək etmək üçün hərracda satmağı planlaşdırdığı 26.000 avroluq "Audemars Piguet" saatını bəyan etmədiyi iddiası ilə çərşənbə günü Münhen hava limanında gömrük işçiləri tərəfindən qısa müddətə saxlanılıb.
Bizimyol.info xəbər verir ki, Almaniyanın "Bild" qəzeti gömrük rəsmilərinə istinadən xəbər verir ki, Avstriya əsilli 76 yaşlı aktyor və Kaliforniya ştatının keçmiş qubernatoru, Los-Ancelesdən Münhenə gələrkən təxminən üç saat hava limanında saxlanılıb.Şvartseneggerin baqajında axtarış aparan məmurlar onu kənara çəkiblər və aktyorun gəlişində gömrük blankında bəyan etmədiyi iddia edilən saatı tapıblar. Münhendəki Baş Gömrük İdarəsinin sözçüsü: “Biz cəzalandırma prosedurlarına başlamışıq. Saat xaricdən gətirildiyi üçün qeydiyyatdan keçməli idi”, - deyə qeyd edib.
Şvartsenegger səlahiyyətlilərə saatın İqlim Təşəbbüsünə bağışlandığını və cümə axşamı günü axşam Avstriyanın Kitzbühel xizək kurortunda keçiriləcək tədbirdə hərraca çıxarılacağını izah etməyə çalışdığını söyləyib.
"Bild"in məlumatına görə, səlahiyyətlilər Şvartseneggerdən 4 min avro vergi və 5 min avro cərimə də daxil olmaqla 35 min avro tələb ediblər. Aktyorun cəriməni kredit kartı ilə ödəməyi təklif etdiyi deyilir, lakin Almaniya gömrük qaydalarına görə cərimənin yarısı nağd şəkildə ödənilməlidir.
Gömrük işçilərinin Şvartseneggerin səyahətinə davam etməsinə icazə verilməmişdən əvvəl onu nağd pul çıxarmaq üçün banka müşayiət etdiyi bildirilir.
