Prezidentin oğlunun maşını İstanbulda kuryeri vurub öldürdü
İstanbulda kuryer Somali prezidentinin oğlunun olduğu avtomobilin vurmasından təxminən 1 həftə sonra dünyasını dəyişib.
Axar.az xəbər verir ki, bu barədə DHA agentliyi məlumat yayıb.
Bildirilib ki, qəza noyabrın 30-da İstanbulun Kennedi şossesində baş verib.
Motosiklet sürən 38 yaşlı kuryer Yunus Geçer yol kənarında dayanmaq üçün tunelin çıxışında sürətini azaltmağa başlayıb. Həmin istiqamətdə hərəkət edən və içərisində Məhəmməd Həsən Mahmudun olduğu avtomobil motosikletə çırpılıb və zərbənin təsirindən Geçer yola yıxılıb.
Geçer həkimlərin səyinə baxmayaraq, xəstəxanada dünyasını dəyişib. Ölən şəxsin yaxınlarının bildirdiyinə görə, Mahmudun olduğu avtomobilin sürücüsü qəza zamanı əyləci basmağa cəhd etməyib. Onlar Geçerin ölümündə günahkar kimi Mahmudun həbsini tələb edirlər.
