İran rejimi etirazlarla bacarmır - Xameneidən şok çağırış
İranın ali dini lideri Əli Xamenei etirazçıların cəzalandırılmasını tələb edib.
Publika.az xəbər verir ki, bu barədə Xamenei İsfahanda çıxışı zamanı bildirib. O qeyd edib ki, bütün ölkə ərazisində dağıntılara səbəb olan etirazçılar cəzalandırılmalıdır.
“Üsyançılar xalqı küçələrə çıxara bilmədi. Buna görə də çaşqınlıq yaratmaqla, təhlükəsizlik qüvvələrini və məmurları yormağa çalışırlar. Nəticə əldə edə bilməyəcəklər və üsyan sona çatacaq”, - o deyib.
Bu, etirazların başlanmasından sonra Xameneinin 8-ci çıxışıdır. O, Tehrandakı hərbi bazada hərbçilərin qarşısında çıxışı zamanı baş verənlərə ilk dəfə toxunmuşdu və bildirmişdi ki, “düşmən məğlub olub”. Hərçənd, son iki ayda baş verənlər göstərir ki, etirazlar artan xətt üzrə davam edir, xüsusilə rejim qüvvələrinin sərt müdaxiləsi xalqın qəzəbini daha da artırır. Bunun sonuncu nümunələlərindən biri də Xameneinin doğulduğu Xamnədəki evinin yandırılması oldu.
Xamneyi isə iki ay sonrakı çıxışında da mövqeyini yumşaltmayıb və etirazların boğulması tələbini irəli sürüb.
Lakin budəfəki çıxışında diqqətçəkən məqamlar da var. Etirazlara qarşı sərt müdaxiləyə çağıran dini lider “xalqın, gənclərin və məmurların ümidini itməsindən”, “ölkədə azadlığın olmaması haqda təbliğatdan” danışıb, tərəfdarlarını, xüsusilə yazıçıları, şairləri, elm adamlarını, din xadimlərini xalqda “ümid yaratmağa” çağırıb. Bütün bunlar göstərir ki, rejim etiraf etməsə də, etirazların ciddi təsiri olub.
SEPAH komandanı Hüseyn Səlami və Baş qərargah rəisi Məhəmməd Baqiri etirazçılara dəfələrlə xəbərdarlıq edib. Daxili işlər naziri Əhməd Vahidi isə ən azı iki dəfə “üsyana son qoyulduğu” haqda danışıb. Lakin etirazlar səngiməyib. Bu, rejimin yalan danışdığının sübutudur. Son günlər İran rejimi o iddianı tirajlayır ki, etirazları yatırmaq üçün tam gücdən istifadə etməyiblər, halbuki, bütün təhlükəsizlik qüvvələri, eləcə də mülki geyimli dəstələr işə salınsa da, rejim heç bir nəticə əldə etməyib.
Xameneinin son çıxışı da göstərdi ki, İran rejimi əslində nə edəcəyini bilmir. İstisna deyil ki, etirazların yatırılması üçün silahlı müdaxilə genişləndirilə bilər.
