Vətənin, elmin və ziyalılığın SÖNMƏZ CIRAĞI...

Azərbaycan torpağı tarixən çox dəyərli, parlaq şəxsiyyətlər yetişdirib. Elmin, təhsilin, mənəviyyatın, sadəliyin və xalqına sədaqətin timsalı olan insanlar bu xalqın sabaha ümidini diri saxlayıb. Bu gün belə ziyalılardan biri haqqında söz açmaq hər bir yazı adamı üçün həm şərəfdir, həm məsuliyyət. Çünki belə şəxsiyyətlər haqqında yazmaq yalnız sadəcə bioqrafik ardıcıllıq yaratmaq deyil, həm də onların mənəvi zənginliyini və insanlıq missiyasını hiss etdirməkdir. Bu yazının qəhrəmanı – Anar Nazim oğlu Eminov, məhz bu cür şəxsiyyətlərdəndir.

 Ucalığa gedən yol

1970–80-ci illərdə doğulub-böyüyən bir çox alim və ziyalılarımız kimi, Anar müəllimin də həyatı zəngin, təməli möhkəm olan şəhər həyatından başlamışdır., Ancaq valideynləri Azərbaycanın ürəyində, əsrlərin yaddaşını daşıyan torpaqda – Ağsunun Rəhimağalı kəndində dünyaya gəlmişdir. Bu kənd təkcə atasının doğulduğu yer deyil, həm də onun ruhunun, yaddaşının və kimliyinin daimi mənbəyidir.

Onun həyat yolu Sumqayıtda yerləşən Texniki və Təbiət Elmləri Liseyində aldığı orta təhsillə davam etdi. Burada qazandığı təməl biliklər, onun gələcəkdə böyük bir elm adamına və idarəçiyə çevrilməsinin əsas sütunlarına çevrildi. Hələ o yaşlardan fərqliliyi, analiz qabiliyyəti, suallara yanaşması müəllimlərinin diqqətindən yayınmazdı.

Elm yolunda ardıcıl addımlar

Anar Eminovun yüksək təhsil yolu 1999-cu ildə Azərbaycan Dövlət İqtisad Universitetinin "Beynəlxalq ticarət" ixtisasında başladı. Dörd illik bu bakalavr təhsili, onun təhsil həyatının təkcə bir mərhələsi yox, həm də beynəlxalq iqtisadi sistemlərə olan marağının möhkəm təməli idi. O, bu ixtisası fərqlənmə diplomu ilə başa vuraraq, bir daha sübut etdi ki, sıravi tələbə olmaqla kifayətlənmir – o, öyrənməyi sənətə, məqsədə çevirənlərdəndir.

Onun xaricdəki təhsil illəri – Türkiyənin Egey və Dokuz Eylül universitetlərində aldığı magistr təhsili, onu təkcə elmi biliklərlə deyil, dünya təcrübəsi ilə də zənginləşdirdi. "Beynəlxalq biznesin idarə edilməsi" üzrə aldığı biliklər, sonralar onun Azərbaycanın təhsil və iqtisadi idarəetmə sistemində mühüm yerlərdə uğurla çalışmasını şərtləndirəcəkdi.

Bununla belə, Anar Eminov elmi çoxistiqamətli düşüncə ilə dəyərləndirən bir ziyalı kimi hüquq sahəsində də öz biliklərini artırmaq qərarına gəldi. 2006–2010-cu illərdə Qərb Universitetində hüquq təhsili aldı. Paralel olaraq, Beynəlxalq Ticarət İnstitutunun "Elektron ticarət" üzrə distant kursunu da bitirərək, çağdaş iqtisadiyyatın rəqəmsal transformasiyasını dərindən mənimsədi.

Elmdə və idarəetmədə parlaq fəaliyyət

İdarəçilik qabiliyyətləri və strateji baxışları ilə seçilən Anar Eminovun rəhbər vəzifələrdəki fəaliyyəti 2018-ci ildə Azərbaycan Turizm və Menecment Universitetinin prorektoru təyin olunması ilə yeni mərhələyə qədəm qoydu. Bu vəzifədə o, təhsildə innovativ yanaşmaların tətbiqinə xüsusi önəm verdi.

2023-cü ildə Azərbaycan Texniki Universitetinin Tədqiqat və İnkişaf şöbəsinin müdiri, ardınca isə Yüksək Təhsil İnstitutunun direktoru vəzifəsində çalışması, onun ali təhsilin inkişafında dövlət səviyyəsində etimad qazandığını göstərdi.

2025-ci ildə London Universitetində "Menecerin əsas idarəetmə alətləri" üzrə kursu bitirməsi isə onun elmi potensialına yeni nəfəs verdi. O, bu kursdan qayıtdıqdan sonra Azərbaycan ali təhsil sistemində idarəetmənin daha çevik və müasir əsaslarla qurulmasının vacibliyini dilə gətirən və bu istiqamətdə əməli addımlar atan ilk rəhbərlərdən biri oldu.

9 aprel 2025-ci ildə isə ölkə başçısı cənab İlham Əliyevin sərəncamı ilə Anar Nazim oğlu Eminov Mingəçevir Dövlət Universitetinin rektoru təyin edildi. Bu təyinat sadəcə şəxsi nailiyyət deyil, dövlətin gənc, savadlı, vətənpərvər kadr siyasətinə verdiyi önəmin təzahürü idi.

Elmi miras və intellektual töhfələr

Anar Eminov elmi fəaliyyəti ilə də seçilir. 2012-ci ildə iqtisad üzrə fəlsəfə doktoru elmi dərəcəsini, 2016-cı ildə isə dosent elmi adını almışdır. Onun tədqiqatları sosial yönümlü investisiyaların effektivliyi, idarəetmə sistemlərinin optimallaşdırılması və təhsildə keyfiyyətin artırılması mövzularını əhatə edir.

O, 200-ə yaxın elmi məqalənin, 5 dərs vəsaitinin və 1 monoqrafiyanın müəllifidir. Onun elmi əsərləri təkcə Azərbaycanda deyil, beynəlxalq elmi jurnallarda da dərc olunur. Elmdəki bu zənginlik, idarəçilikdəki çevikliklə birləşərək onu müasir dövrün intellektual liderinə çevirir.

Səmimiyyət, sadəlik və vətənpərvərlik – onu fərqləndirən cəhətlər

Bütün bu uğurların arxasında güclü iradə, dərin zəka və sonsuz vətən sevgisi dayanır. Anar müəllimin hər kəsin dilində olan əsas xüsusiyyəti isə onun sadəliyi və səmimiyyətidir. Onunla bir dəfə ünsiyyətdə olmaq kifayətdir ki, qarşıdakı insanın nə qədər səmimi, açıqqəlbli və təvazökar olduğunu anlayasan.

Ən maraqlısı isə odur ki, Anar Eminov harada çalışsa, hansı məclisdə olsa belə, ilk növbədə özünü "Ağsulu" kimi təqdim edir. Bu, sadəcə coğrafi mənsubiyyət deyil. Bu, bir ruhi bağlılıq, bir kimlik məsələsidir. Rəhimağalı kəndinin adını daşımaqla fəxr edən Anar müəllim, bu torpağın adını ucaldır, onu yaşadır.

Gənclərə örnək bir həyat

Bu günlərdə ixtisas seçimində olan minlərlə gəncə bir tövsiyəmiz var: Siz sadəcə diplom almaq yox, həm də insanlıq, vətəndaşlıq və ziyalılıq məktəbi keçmək istəyirsinizsə – Mingəçevir Dövlət Universitetini seçin. Çünki bu universitetin başında duran şəxs – Anar Eminov – özü bir məktəbdir. O, təkcə biliyi deyil, dürüstlüyü, zəhmətsevərliyi və vətənə bağlılığı da öyrədir.

Ona baxaraq gənclər anlayırlar ki, sadə kənd mühitindən çıxıb da böyük uğurlara imza atmaq mümkündür. Yetər ki, məqsədin olsun, niyyətin təmiz, əməyin halal olsun.

Sözün sonunda...

Anar Nazim oğlu Eminovun həyatı bir nağıl deyil – bu, zəhmətin, elmə, millətə və torpağa bağlılığın real tarixçəsidir. Bu tarixçə hələ davam edir. Biz inanırıq ki, bu parlaq yol daha da işıqlı mərhələlərə aparacaq və Anar müəllimin adı daha böyük vəzifələrdə, daha geniş tribunalarda eşidiləcək.

Çünki o, bu xalqın içindən çıxan, bu xalq üçün çalışan və bu xalq tərəfindən sevilən bir insandır.

Hazırladı:

Valid Musayev