Yevlaxda musiqi məktəbləri hansı “idarəçilik notları” ilə çalınır?
Rəfail Məmmədovun ikili kreslo siyasəti və mədəniyyət necə gözdən salınır...
Yevlax rayonunda mədəniyyət və təhsil sahəsində ciddi suallar doğuran vəziyyət yaranıb. Artıq bir neçə ildir ki, Yevlax şəhəri Aran qəsəbəsi musiqi məktəbinin direktor əvəzi postunu daşıyan Rəfail Məmmədov eyni zamanda Xaldan musiqi məktəbinin də direktoru vəzifəsini əlində saxlayır. Sadə sual ortaya çıxır: görəsən, Yevlaxda savadlı, təcrübəli, peşəkar musiqi müəllimləri yoxdurmu ki, iki məktəbə yalnız bir adam rəhbərlik etməlidir?
Bu sual əslində yalnız bir şəxsin timsalında ortaya çıxan problem deyil. Burada həm idarəetmənin keyfiyyəti, həm regionda musiqi təhsilinin gələcəyi, həm də mədəniyyət siyasətində şəffaflığın nə dərəcədə qorunduğu məsələsi dayanır.
“Orta ixtisasla” yüksək postlar?
Məlumata görə, Rəfail Məmmədov ali musiqi təhsilli deyil, orta ixtisaslı kadırdır. Əlbəttə, musiqi sahəsində istedad və praktiki təcrübə önəmli faktorlardır, amma rəhbərlik mövqeyi üçün peşəkar baza, nəzəri savad və idarəçilik qabiliyyəti də əsas şərtlərdir.
Bu halda isə sual yaranır: hansı üstünlüyünə görə bütün məktəblərin “başında” yalnız bir nəfər dayanmalıdır? Yevlaxda və ətraf rayonlarda yüzlərlə peşəkar musiqi müəllimi fəaliyyət göstərir. Onların arasında illərlə məktəblərdə dərs deyən, şagird yetişdirən, konsertlərdə iştirak edən, ali musiqi təhsilli, təcrübəli mütəxəssislər var. Bəs onlar niyə rəhbərliyə gətirilmir?
Əksinə, hər yerdə eyni adamın kresloya oturdulması həm kollektivin daxili mühitini zəhərləyir, həm də təhsil prosesinə inamı sarsıdır.
“Regionu ələ alıb” – iddialar və faktlar
BİA.az bildirir ki, şikayətlərə görə, Rəfail Məmmədov yalnız direktor postu ilə kifayətlənmir, həm də hər iki məktəbdə öz kadrlarını yerləşdirib. Bu isə şəffaf seçim mexanizmini sıradan çıxarır. İddialara görə, müəllimlərin işə qəbulu, dərs bölgüsü, hətta şagirdlərin qəbul prosesi belə şəxsi maraqlara uyğun qurulur.
Xaldan musiqi məktəbində bu il qəbul planı ilə bağlı ciddi narazılıqlar var. Məlumata görə, qəbul az olub, həm də əsasən ödənişli əsaslarla aparılıb. Təkcə Xaldanda 40 nəfər şagirdin qəbul edildiyi bildirilir. Əslində musiqi məktəbləri dövlət təhsil müəssisələridir və uşaqların yaradıcılıq imkanlarını inkişaf etdirmək, regionda mədəni mühiti zənginləşdirmək üçün fəaliyyət göstərir. Bu prosesin kommersiyalaşdırılması – uşaqları “ödəniş” əsasında seçmək – təhsil prinsiplərinə ziddir.
Əgər təhsil kommersiya maraqlarına qurban verilirsə, bu zaman nə incəsənət inkişaf edə bilər, nə də gənc istedadlar ortaya çıxar. Bu, birbaşa musiqi mədəniyyətinin deqradasiyasıdır.
Ağdaş Regional Mədəniyyət İdarəsi ilə “əlbirlik”?
Yevlax ictimaiyyətində dolaşan iddialara görə, Rəfail Məmmədov bu vəzifələri və mövqeləri təkbaşına qazana bilməzdi. Onun arxasında Ağdaş Regional Mədəniyyət İdarəsinin dəstəyi dayanır. Deyilənə görə Ağdaş Regional Mədəniyyət İdarəsinin müdüri Namiq Tarıverdiyev hansı keyfiyyətlərinə görəsə Rəfail Məmmədovun "caldıgı havaya" oynayır.
Əgər bu iddialar doğrudursa, deməli, söhbət sadəcə şəxsi maraqlardan yox, mədəniyyət sahəsində sistemli korrupsiya və himayədarlıq mexanizmindən gedir. Bu da təkcə bir rayonun yox, bütün bölgənin mədəni mühitinə zərbədir.
Mədəniyyət nazirliyi son illər islahatlar elan etsə də, yerlərdə belə halların davam etməsi o islahatların söz olaraq qalmasından xəbər verir. Əgər mədəniyyət müəssisələri “özəl biznes” kimi idarə olunacaqsa, dövlətin ayırdığı büdcə, xalqın etimadı hara gedəcək?
Musiqi məktəblərinin nüfuzuna kölgə
Musiqi məktəbi sadəcə dərs yeri deyil. Burada hər bir uşaq öz istedadını kəşf edir, öz dünyasını musiqinin dili ilə ifadə etməyi öyrənir. Orada müəllim-şagird münasibətləri yalnız peşə yox, həm də ruhani bağdır.
Lakin bu gün Yevlaxda baş verənlər həmin məktəblərin nüfuzunu yerlə-yeksan edir. Şagirdlərin valideynləri arasında narazılıq artır, müəllimlər isə təzyiq altında işləməli olurlar. Təhsil prosesinin yaradıcılıq mühiti yox, intriqa və maraq üstündə qurulması isə musiqi təhsilinə ən böyük zərbədir.
Cavabdehlik tələb olunur
Bu suallar ortadadır və cavablandırılmalıdır:
- Nə üçün Yevlaxda bütün musiqi məktəbləri bir nəfərin əlində cəmləşib?
- Niyə ali musiqi təhsilli kadrlar kənarda qalır?
- Uşaq qəbulunun ödənişli aparılması hansı qanuna uyğundur?
- Ağdaş Regional Mədəniyyət İdarəsinin bu prosesdə rolu nədən ibarətdir?
Əgər dövlət orqanları, xüsusilə də Mədəniyyət Nazirliyi bu suallara cavab verməsə, deməli, ittihamların həqiqət payı böyükdür.
P.S:Musiqi mədəniyyətin ən həssas sahələrindən biridir. Onu şəxsi maraqlara qurban vermək xalqın yaradıcılıq potensialını baltalamaq deməkdir. Yevlaxda baş verənlər sadəcə bir idarəçilik məsələsi deyil, həm də gələcək nəsillərin istedadına atılan kölgədir.
Cəmiyyət, ictimaiyyət və medianın borcu belə halları işıqlandırmaq, məsul şəxslərdən cavab tələb etməkdir. Əks halda, sabah bu məktəblərdə doğulacaq istedadlı uşaqların səsi susacaq, musiqi təhsili isə boş kresloların, “şəxsi maraqların” girovuna çevriləcək.
BİA.az
