Bia.Az

Admiral: “Görünməmiş münaqişə baş qaldıra bilər”

Siyasət
 13-12-2021, 11:43     223

Böyük Britaniya Silahlı Qüvvələri Baş Qərargahının rəisi admiral Entoni Radakin bildirib ki, Rusiyanın Ukraynaya hücumu İkinci Dünya müharibəsindən bu yana ən böyük münaqişəyə gətirib çıxara bilər.
Novator.az saytı “The Times” qəzetinə istinadla xəbər verir ki, hazırda Ukrayna sərhədində yaranmış vəziyyətin narahatlıq doğurduğunu deyən admiral Rusiya hərbi müdaxiləyə əl atsa, Böyük Britaniyanın da bu hücumun qarşısını almaq üçün hərəkətə keçməli olacağını diqqətə çatdırıb: “Bütün bunlar dərin narahatlıq doğurur. Ukrayna tam işğala məruz qalsa, bu, ən pis ssenarilərə, İkinci Dünya müharibəsindən bəri Avropada görünməmiş miqyasda bir münaqişəyə səbəb ola bilər”.
“The Times”ın yazdığına görə, Böyük Britaniyanın müdafiə naziri Ben Uolles də bəyan edib ki, Ukraynanın suverenliyinə təhlükə yaranacağı təqdirdə NATO-nun Kiyevə yardım etmək üçün tədbirlər planı var və bu plana kiberməkana aid tədbirlər də daxildir.
2014-cü ilin fevralında Ukraynada hakimiyyət xalq üsyanı ilə dəyişəndən, Rusiyanın adamlarını Qərbə yaxın qüvvələr əvəzləyəndən sonra rus ordusu Ukraynanın Krım yarımadasını zəbt edib. Rusiya Krımı ilhaq etməklə bərabər Donbasda iki separatçı rejimin əli ilə Ukraynanın bu bölgəsinin də bir hissəsini işğal altına alıb.
2021-ci ilin yazında Rusiya Ukrayna sərhədinə xeyli qoşun yığıb, yeni müharibə təhlükəsi yaranıb. Az sonra Rusiya qoşunlarının bir hissəsini geri çəkib.
Lakin ilin sonlarına yaxın Rusiya yenidən Ukrayna sərhədi boyunca qoşun, hərbi texnika cəmləməyə başlayıb. Bütün bunlar Rusiyanın Ukrayna torpağına növbəti hərbi hücuma hazırlaşdığı istiqamətində ehtimallar doğurub.

Mənbə: Thetimes.co.ukскачать dle 12.1