KORONAVİRUSA QARŞI DƏRMANLARI KİM BAHALAŞDIRIR? – “Çıxıb izahat verən yoxdur...”
Yeni növ koronavirusla mübarizədə istifadə olunan bəzi dərmanlar Azərbaycandakı apteklərdə çətinliklə tapılır. Şikayətlərə görə, "əlaltından" tapılanda da onları real qiymətlərindən çox baha almaq mümkün olur...
Bu barədə "Azadlıq" radiosuna adlarının çəkilməsini istəməyən bir neçə şikayətçi də danışıb. Onların sözlərinə görə, koronavirusa yoluxan şəxsin 15 günlük müalicəsi minimum 400-500 manata başa gəlir.
"Bəzi dərman preparatlarına tələbat çox yüksək olur…"
Bakıda yerləşən bir neçə apteklərdə də şikayətçinin sözlərini qismən təsdiqlədilər. "Bəzi dərman preparatlarına tələbat çox yüksək olur ki, müraciət edənlərin hamısına çatmır. Firmalardan hər gün dərman gətirmirlər deyə, hərdən "yoxdur" deməli oluruq. Tələbat çox yüksəkdir", - apteklərdən birində vurğuladılar.
"Xəstə olmaya-olmaya dərmanları alıb yığır evə"
Amma bahalaşma ilə bağlı şikayətləri onlar düzgün saymırlar. Milli Məclisin Səhiyyə komitəsinin üzvü Məlahət İbrahimqızı "Turan" agentliyinə bildirib ki, apteklərdə dərmanların çatışmazlığı ilə bağlı məlumatı yoxdur: "Açığı, bilmirəm, doğrudan da belədir ya yox. Camaat təşvişə düşüb, üstəlik də, xəstə olmaya-olmaya dərmanları alıb yığır evə. Sanki aptekdən hər şeyi almaq istəyirlər. Koronavirus virus mənşəlidir və getdikcə mutasiya edir. İnsanların aldığı bəzi dərmanlar müalicə zamanı lazım deyil".
Deputat paytaxtda koronavirusla mübarizədə istifadə edilən dərmanların tamamilə olmadığını düşünmür: "...Çeşidlər çoxdur. Dərmanlar da elə dərmanlar deyil ki, tapmaq mümkün olmasın. Amma yenə də məsələ ilə bağlı hər hansı şikayətlər varsa, aidiyyəti qurumlar həmin məsələ ilə maraqlanmalıdır. Həmin qurumlar apteklərdə monitorinq edə bilərlər".
"Bunu təşvişlə qarşılamaq lazım deyil..."
M. İbrahimqızının vurğulayıb ki, elə dərmanlar var, onu xəstəyə vermək məsləhətli deyil: "Lakin adamlar yenə də həmin dərmanları alır, evə doldurur. Bütün dünyada bu xəstəlik gözlənilmədən peyda olub, hətta ən zəngin ölkələr buna hazır deyildi. Ona görə müəyyən xırda problem yaşanır. Dərman bu gün yoxdursa, sabah mütləq olacaq. Mənə elə gəlir ki, bunu təşvişlə qarşılamaq lazım deyil, amma yenə də hər ehtimala qarşı müvafiq qurumlar apteklərdə monitorinq etsələr, yaxşı olar".
Tibb elmləri doktoru Adil Qeybulla bildirib ki, koronavirusa yoluxmuş insanların sayı həddindən artıq çoxdur: "Üstəlik də, insanlar panikadadır, xəstəxanalarda yer yoxdur. Əvvəllər virusa inanmayanlar artıq görürlər ki, qonşuda, qohumda xəstəlikdən ağırlaşıb dünyasını dəyişənlər var. Bundan əlavə, görürsən ki, ordan-burdan reseptlər əllərdə gəzir. Bəlkə də bu reseptlərdə müəyyən dərmanları xüsusi yazıb ötürüblər ki, həmin dərmanlar satılsın".
"Çıxıb izahat da verən yoxdur..."
Professorun sözlərinə görə, Azərbaycanda ilk dövrlər koronavirusa aidiyyəti olmayan bəzi dərmanlar bu xəstəliyin müalicəsi üçün satılıb: "Çıxıb izahat da verən yoxdur ki, ay camaat, bu dərmanları alıb boş-boş işlətməyin, boş-boşuna orqanizmi zəhərləməyin. Bu pandemiya qurtaracaq, amma bundan sonra insanların aldığı bu dərmanlarının yan təsirləri qurtarmayacaq. Ona görə, hesab edirəm ki, bununla bağlı müvafiq qurumlar çıxıb izahat verməlidirlər, camaatın arasında maariflənmə işi aparmalıdırlar. Vəziyyət çox ciddidir və mən burada sabotaj elementlərini görürəm".
"Bu, biabırçılıq deyilmi?"
Həkim qeyd edib ki, Azərbaycanda dərman idxalı ilə məşğul olan şirkətlərin böyük əksəriyyəti gec-tez yaranmış vəziyyətə görə cavab verəcəklər: "Onlar bu vəziyyətdən sui-istifadə etdilər. Əvvəla, onlar buna cavabdehdirlərsə, niyə bu dərmanların təchizatını lazımi səviyyədə təmin etmirlər? Bunun monopoliyası bunların əlindədir axı və məsuliyyət onların çiynindədir. Bu qıtlığı yaradaraq bundan varlanmaq, müxtəlif korporativ maraqlarını təmin etmək məsuliyyət yaradır və bunu edən adamlar sorumludurlar. Çıxsınlar izahat versinlər, niyə dərmanın bir növünün bir ampulası 50 manatadır, digər növünün bir tabletkası 10 manata? Kim məqsədli şəkildə yaradır bu bahalığı? Bu, biabırçılıq deyilmi?".
Səhiyyə Nazirliyi nə deyir
Səhiyyə Nazirliyinin mətbuat xidmətindən isə "Turan" agentliyinə bildirilib ki, apteklərin dərmanla təchizatı onların səlahiyyətində deyil. "Səhiyyə Nazirliyi aptekləri dərmanlarla təchiz etmir deyə, apteklərdə dərman qıtlığı olub-olmadığını deyə bilmərik", - qurumdan qeyd olunub.
Azərbaycanda dərman idxalı və satışı ilə məşğul olan şirkətlərdən isə məsələ ilə bağlı münasibət öyrənmək mümkün olmayıb.
