Türkiyədə vəfat edən azərbaycanlı prokurorun ölümü ilə bağlı şok iddia - VİDEO
Azərbaycandan olan prokuror 29 yaşlı Emin Hüseynovun Türkiyənin Antalya şəhərində tətildə olarkən idman zalında ölməsi ilə bağlı yeni şok iddialar ortaya çıxıb.
Bu barədə “Hürriyet” xəbər yayıb.
E.Hüseynov xanımı E.H. ilə birlikdə 2017-ci ilin avqust ayında Antalyaya tətilə gedib. Lara turizm bölgəsində beşulduzlu oteldə qalan E.Hüseynovun avqustun 18-də günorta saatlarında otelin idman zalında halı pisləşib. O, dərhal özəl xəstəxanaya aparılıb, oradan isə Akdeniz Universitet Xəstəxanasına köçürülüb. Həkimlərin səyinə baxmayaraq, Eminin həyatını xilas etmək mümkün olmayıb.
Oğlunun zəhərlənərək öldürüldüyünü irəli sürən ata Bəybala Hüseynov xəstəxanada Eminin ekspertiza üçün yarılmadığını, polis və ədliyyə qurumlarına məlumat verilmədən cənazəsinin Azərbaycana göndərildiyini bildirib.
Vəkil Elçin Məmməd vasitəsilə həm Antalyada, həm də Azərbaycanda ədliyyə qurumlarına müraciət etdiklərini bildirən B.Hüseynov oğlunun aparıldığı xəstəxanada qanında tapılan prokaltsitonin səviyyəsinin yüksəlməsinin zəhərlənməyə görə baş verdiyini öyrənib. Atanın sözlərinə görə, mütəxəssislərdən aldığı arayışda onun xaricdən qəbul edilən bir maddə ilə zəhərləndiyi yazılıb.
Şübhəli gəmi gəzintisi
Tətil proqramında olmamasına rəğmən oğlunun ölümündən bir gün əvvəl gəmi turuna çıxdığını, zəhərlənmə hadisəsinin də bu səfərdə həyata keçirildiyini bildirən B.Hüseynov həmin səfəri təşkil edən şəxs və ya şirkətlə heç cürə əlaqə yarada bilmədiyini vurğulayıb.
Bundan başqa o, oğlunun qan analizlərinin cavablarının gizlədilməsi iddiası ilə həkimlərin də istintaqa cəlb olunması tələbini irəli sürüb.
Antalya Baş Prokurorluğuna yeni müraciət
Vəkil Elçin Məmməd Azərbaycandan əlavə, Antalya Respublika Baş Prokurorluğunda dəfələrlə iddia qaldırdıqlarını, sonuncu dəfə isə 2020-ci ilin fevralın 28-də yenə müraciət etdiklərini deyib.
“Mərhumun ölümü onu müalicə edən həkim və xəstəxana heyəti tərəfindən hadisədən sonra ədliyyə qurumlarına bildirilməyib. O, öləndən sonra təbii ölüm arayışı hazırlanaraq xəstəxanadan çıxarılıb və Azərbaycana gətirilərək dəfn edilib. Bu hadisəni ədliyyə qurumlarına bildirməyən şəxslər və həkim haqqında aparılan istintaqın tamamlanması zəruridir”.
Elçin Məmməd müdafiə tərəfinin mərhumun xanımı E.H.-nın da ərinin ölümündə əli olmasından şübhələndiklərini bildirib:
“Mərhum qaraciyər əməliyyatı keçirdikdən sonra dərman qəbul etdiyi halda, E.H. bunu onu müalicə edən həkimlərə deməyib. O, ərinin ölümündən sonra mərhuma aid telefondan bütün məlumatları silib. Müvəkkilin bununla bağlı suallarına isə yanlış və ziddiyyətli cavablar verən E.H. əri xəstəxanada olduğu vaxt konsertə gedəcək qədər laqeyd davrana bilib”.
Telefonu dənizə atılıb
Vəkil Elçin Məmməd bundan başqa E.H.-nın anası A.M. ilə mərhumun cib telefonunu dənizə atdığını deyən qardaşı O.M.-in də hadisə ilə bağlı şübhəlilər siyahısında olduğunu deyib.
“Bu şəxsləri ətraflı dindirmək, gizlətdikləri məsələləri aydınlaşdırmaq və onlara qarşı məhkəmə iddiası qaldırmaq lazımdır”.
Arayışda tətili təşkil edən firma sahibi Y.N. və D.İ. adlı şəxslərin planda olmayan gəmi gəzintisini gizlətdikləri, istintaqı yanıltdıqları və ətraflı dindirilməli olduqları vurğulanıb.
