Naxçıvan Vasif Talıbovun YOLUNDAN ÇIXA BİLMİR: 40-45 dərəcə istidə İMƏCLİK… – Hələ XAN bunlardan insaflı idi…
Naxçıvanda dövlət idarə və müəssisələrində çalışanlar şənbə və bazar günləri 40-45 dərəcə istidə günəş altında iməciliyə çıxmağa məcbur edilirlər. DİA.AZ bildirir ki, bu haqda „Gündəlik Naxçıvan“a onların özləri məlumat verib. Şikayətçilər deyir ki, bununla onların iki hüququ kobud pozulmuş olur: icbari qul əməyinə məcbur edilmə; yüksək temeraturda açıq havada işləməyə məcbur edilmə. Əmək Məcəlləsinə görə, 41 dərəcədən yuxarı temeraturda açıq havada işlədilmək qəti qadağandır.
Naxçıvan şəhərindəki dövlət müəssisələrinin birində çalışan R. Qurbanov deyir ki, Naxçıvanda iməciliklərin təməlini Vasif Talıbov qoysa da, o bu məsələdə daha insaflı davranırmış:
“Hər həftənin şənbə və bazar günləri məcburi iməciliyə çıxmağın təməlini 30 ilə yaxındır ki, Vasif Talıbov qoyub. Buna görə ona min lənət düşür. Lakin, o göstəriş vermişdi ki, 38 dərəcədən yuxarı temeraturda iməciliklər dayandırılsın. Naxçıvanın yeni başçısı Fuad Nəcəfli bu məsələdə Talıbovdan da qəddar davranır, bizi 45 dərəcə istidə, günəşin altında qul kimi işləməyə məcbur edir, güzəşt də etmir. Hər həftənin şənbə və bazar günləri minlərlə müəllim, həkim və.s çöllərə düşüb, alaq təmizləməyə məcbur edilirlər. Axı, bizim də istirahət hüququmuz var. Ot-alaq vurmaq üçün ştatda olan yülərlə işçi var. Bu işləri onlar görməlidir. Bizi işlədib, onlara yazılan maaşı ciblərinə qoyurlar”.
Şahbuz rayonundan olan şikayətçi S. Məmmədov isə deyir ki, iməciliyə çıxmayanlar işdən çıxarılmaqla, polislə hədələnirlər. Şikayətçi həmçinin bildirir ki, onların idarəsi hər gün iməciliyə çıxmağa məcbur edilir:
“İşlədiyim idarədə bir neçə şöbə var. Bu şöbələr növbəyə qoyulub. Onlardan biri hər gün dəyişən şəkildə növbətçi olur. Digərləri isə hər gün iməciliyə çıxarılır. Şikayət edəni işdən qovmaqla, polislə hədələyirlər. Heç kim iş yerini itirmək istəmədiyi üçün boyun əyməyə məcbur oluruq“.
Naxçıvandakı bütün rayonlar kimi Culfa sakinləri də iməcilikdən şikayətçidirlər:
“Güya ki, dövlət qulluqçusuyuq. İsti demədən, soyuq demədən hər həftənin şənbə günləri məcburi iməciliyə çıxarırlar. Günün altında cəhənnəm əzabı yaşayırıq. Vətəndaşların da yanında biabır olmuşuq. Bizə kölə kimi yanaşırlar. Etiraz edəndə də deyirlərki, xoşun gəlmir işdən çıx. İşdən çıxıb, nə edəcəyik?Naxçıvanda hakimiyyət dəyişikliyi olanda sevindik ki, iməciliklərdən canımız qurtardı. İndi bu iməciliklər daha sərt formada həyata keçirilir“.
