Bəxtiyar Hacıyevin həbs müddəti daha üç ay uzadıldı
İyulun 22-də Bakının Xətai rayon Məhkəməsi istintaq orqanının vəsatəti əsasında insan hüquqları fəalı Bəxtiyar Hacıyev barəsində həbs-qətimkan tədbiri daha 2 ay 10 gün, oktyabrın 8-dək uzadıb.
Vəkil Rövşanə Rəhimli Turana deyib ki, Hacıyev ona qarşı irəli sürülən ittihamları qondarma və təqsirsiz olduğunu bildirib.
Rövşanə Rəhimli qeyd edib ki, məhkəmədə Bəxtiyar Hacıyev həbsinin uzadılmasını qanunsuz və həbsinin siyasi motivli olduğunu deyib.
“Onun saxlanma şəraiti ilə bağlı şikayəti yoxdur. Amma psixoloji gərginliyi davam edir”, deyə o bildirib.
Vəkil birinci instansiya məhkəməsinin qərarından apellyasiya şikayəti verəcəyini də qeyd edib.
Öz növbəsində “Müdafiə Xətti” hüquq müdafiə təşkilatının icraçı direktoru Rüfət Səfərov Amerikanın Səsinə bildirib ki, Bəxtiyar Hacıyev saxta ittihamlar üzrə həbs edilib.
“Bəxtiyar Hacıyev həbs olunduğu gündən etibarən ifadə etdiyim mövqeyimin arxasındayam. O, saxta ittihamlar üzrə həbs edilib, mübahisəsiz siyasi məhbusdur, repressiv idarəetmənin girovudur. Əvvəlki aylarda mürəkkəblik olmamasına baxmayaraq, ibtidai istintaqın müddətini uzatdılar. Sonradan Bəxtiyarı ağır cinayətdə təqsirləndirib, həbsin və ibtidai araşdırmanın müddətini artırdılar. Əsas və səbəb olmadan həbsdə saxlayıb, ibtidai araşdırmanın müddətini uzadırlar. Bu, təəssüf ki, Azərbaycanda möhkəmlənmiş avtoritar idarəçilikdən xəbər verir, üstəlik, məhkəmələrin icra hakimiyyətinin davamı olması faktını təsdiqləyir”, deyə hüquq müdafiəçisi bildirib.
Bəxtiyar Hacıyev ötən il dekabrın 9-da xuliqanlıq və məhkəməyə hörmətsizlik ittihamı ilə həbs edilib.
Dekabrın 15-də Hacıyev azadlığa buraxılması tələbi ilə aclıq aksiyasına başlayıb. O, ictimaiyyət nümayəndələrinin və ailə üzvlərinin israrlı çağırışlarından sonra dekabrın 28-də aclıq aksiyasına son qoyub. Lakin yanvarın 9-da Apellyasiya Məhkəməsi onun həbsdən azad olunmasını rədd etdikdən sonra o, aclıq aksiyasını bərpa edib. Hacıyev aclıq aksiyasının 51-ci günündə aclığı dayandırıb.
Bu il iyunun 16-da istintaq orqanı Bəxtiyar Hacıyevə qarşı Cinayət Məcəlləsinin 192 (Qanunsuz sahibkarlıq), 193 (Yalançı sahibkarlıq), 320.1 (Hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədi ilə saxtalaşdırma), 320.2 (bilə-bilə saxta sənədlərdən istifadə etmə), 206.1 (Qaçaqmalçılıq) maddələri ilə yeni ittihamlar irəli sürüb.
Vəkil Elçin Sadıqov Amerikanın Səsinə bildirib ki, ittihamlar Bəxtiyar Hacıyevin ictimai və hüquq müdafiəçisi kimi fəaliyyəti ilə bağlıdır.
“Yeni ittihamlar QHT işlərində olan ittihamlardır. Guya Bəxtiyar Hacıyev qrantlar alıb və təyinatı üzrə xərcləməyib. Bəxtiyar Hacıyev ittihamları qəbul etmir. O bildirdi ki, ittihamlar onun ictimai və hüquq müdafiəçisi fəaliyyəti ilə bağlıdır. Bu ittihamlar təqibin əsas mahiyyətini göstərir”, vəkil qeyd edib.
Məhkəmə Hacıyev barəsində müxtəlif vaxtlarda həbs-qətimkan tədbirinin uzadılması barədə qərarlar qəbul edib.
ABŞ Dövlət Departamenti, ABŞ Helsinki Komissiyası, Avropa İttifaqı, Avropa Şurası və bir sıra beynəlxalq QHT nümayəndələri dəfələrlə Bəxtiyar Hacıyevin həbsdən azad olunmasını tələb edib.
