Priqojinin arxasındakı güc göründü – Yalnız o ölkədən səs çıxmadı
“Hər bir quruluşun aqibətini xalqın təfəkküründəki hökmün təbiəti müəyyən edir, rus təfəkküründə hökmün məğlubiyyəti həzm olunmur. Rusiyada I Pyotrdan başlayaraq hər bir hərbi məğlubiyyət kardinal dəyişikliklərə səbəb olub”.
BİA.az teleqraf.com-a istinadən xəbər verir ki, bunu politoloq Yeganə Hacıyeva deyib.
Onun sözlərinə görə, 1853-1856-cı illərdə Krım müharibəsi Rusiyada təhkimçiliyin ləğvinə və məhkəmə, təhsil, torpaq və hərbi islahatlara gətirib çıxarıb:
“1904-1905 ci illərdə Rus-Yapon müharibəsindəki məğlubiyyətdən sonra Rusiyada ilk inqilab baş verib. Birinci Dünya Müharibəsində məğlubiyyətdən sonra Çar II Nikolay devrilib və bolşeviklər hakimiyyətə gəlib. 1962-ci ildə Kubaya ballistik raketlər göndərib, sonra da bu addımın yaratdığı böhranın idarə edə bilməməsinə görə geri çağırması məğlubiyyət kimi qəbul olunan Nikita Xruşşov cəmi 1 il 5 ay sonra vəzifəsindən uzaqlaşdırılıb.
Əfqanıstan müharibəsindəki uğursuzluqdan sonra Mixail Qorbaçovun “islahatlar” adı altında savaşı başlatmış köhnə, arzuedilməz qrupları kənarlaşdırmaq kursunu müəyyənləşdirməsində əsas faktorlar idi. Bu addımların hamısının nə ilə nəticələndiyini elə SSRİ-nin aqibətində görmək olar.
Rusiya dövlətçiliyi yenilənə bilən quruluş deyil, liberal şərtlərlə yenilənmir, həmişə təhlükə yaranan kimi siyasi elita özü rəhbəri dəyişir. Lukaşenkoya təşəkkür, ümumiyyətlə, qiyamın yatırılmasında onun adının hallandırılması Putinin özünü elitada müdafiə cəhdidir. Təşəkkür Lukaşenkoya yox, Vaynoya, Patruşevə və Qrızlova düşür, onlar hər şeyi həll edəndən sonra Batkaya təklif ediblər.
Telemüraciətdən sonra “prezident yanılır” deyə fikirindən dönməyən qiyamçını hakimiyyət daxilində kiminsə dayandıra bilməsi Putinin onsuz da laxlamış legitimliyini sındırdı. Xüsusilə bu adam Ukraynaya hücumun əleyhinə olan, bunu prezidentin hələ ən güclü vaxtında aşkar səsləndirə bilən biridirsə, demək, real alternativ var”.
Yeganə Hacıyeva qeyd edib ki, Lukaşenkoya nümayişkaranə təşəkkür və sonra səslənən fikirlər “daxildə Putindən güclü biri var” həqiqətini gizlətmək üçün idi:
“Bununla belə, Batka özünü Rusiyanın (Putinin yox) güvənli dostu kimi tarixə yazdı, rus dövləti bunu unutmaz, unutdurmaz.
Priqojin isə “gəzən meyit”dir, sadəcə zaman məsələsidir, çünki qiyam nəticəsində hakimiyyətə gələnlər belə ilk qiyamçını öldürürlər. Mən onun tək, sığortasız belə riskə gedəcəyinə inanmıram, mütləq kənar qüvvə ilə ittifaqda idi.
Üç gün ərzində Bayden də daxil olmaqla, səkkiz ölkənin rəsmiləri “Priqojin və qiyam bizlik deyil” mesajı verdi. Bir ölkədən başqa… Əslində bu səssizliyin özü elə onu müdafiədir…
