Ərdoğan SƏRT DANIŞDI - Türkiyə buna səssiz qalmayacaq
Türkiyə prezidenti Rəcəb Tayyib Ərdoğan dünən axşam İsrail prezidenti İsaak Hersoqla telefon danışığı aparıb.
Musavat.com xəbər verir ki, iki ölkə lideri İsrail təhlükəsizlik qüvvələrinin Məscidül-Əqsaya basqını, Qiblə məscidinə hücumu və müqəddəs yerlərdə olanlara qarşı müdaxilələri müzakirə edib.
Hadisələrin müsəlmanlar qədər bütün bəşəriyyətin vicdanını yaraladığını bildirən Ərdoğan Məscidül-Əqsanın statusuna qarşı təxribatlar və təhdidlər qarşısında susmalarının mümkün olmadığını vurğulayıb.
Türkiyə lideri bildirib ki, Ramazan ayının xristianların Pasxa bayramı ilə üst-üstə düşdüyü bu həssas dövrdə Qəzza və Livana sıçrayan gərginliyin artmasına imkan verilməməlidir.
Radikal yəhudi qruplarının Məscidül-Əqsaya basqın çağırışlarının narahatlıqları artırdığını ifadə edən Ərdoğan müsəlmanların heç bir problem olmadan namazlarını qılmaları üçün lazımi tədbirlərin görülməsinin vacibliyinə diqqət çəkib.
