Zahid Orucdan SENSASİON AÇIQLAMA - İran Azərbaycanlaşacaq!
"İran parlamentinin ölkəmizin İsraildə səfirliyinin açılmasına qarşı bəyanatı son 3 ildə dini və hərbi rəhbərliyin hücumlarına bütün dövlət hakimiyyətinin qoşulması deməkdir. Beləliklə, İran və Azərbaycan münasibətləri 1991-93 cü illəri çıxsaq, ən aşağı vəziyyətə düşüb və gərginliyi çözmək üçün başqa struktur qalmayıb. İran Məclisi İslam Konfransı Təşkilatına müraciət edib ki, ölkəmizin İsraillə münasibətlərinə mane olsun. Əlbəttə, absurd iddiadır, lakin əvəzində Azərbaycan İranın Ermənistanla münaisbətlərinin İKT-də müzakirəsi üçün əlverişli fürsət qazanıb. Sual olunur-hazırki gərginliyə səbəb nədir?"
Musavat.com xəbər verir ki, bu sözləri Milli Məclisin İnsan hüquqları komitəsinin sədri, millət vəkili Zahid Oruc parlamentin bugünkü iclasında deyib.
Zahid Oruc bildirib ki, birincisi, məğlub Azərbaycan İran üçün təhlükəsiz idi və tarixi şüurdan məhrum azərbaycanlı obrazı çox sərfəli idi. İndi milli məni və dövləti gücü artan qalib xalqın varlığı İranı məhvərindən çıxarır:
"İkincisi, Zəngəzur dəhlizinin açılmasına Ermənistan razılıq vermişdi, lakin iki dövlətin təzyiqindən sonra imtina etdi. “Məni hansı aqibət gözləsə də sülh müqaviləsini imzalayacam” deyən Paşinyanı devirməyə qalxanlardan biri də İran idi. Naxçıvanla kommunikasiyaların açılması nəinki 42 km-lik yolu, bütövlükdə Ermənistanı Zəngəzur dəhlizinə çevirəcəyini nəzərə alaraq, İran Paşinyana ultimatum verdi. Bu gün Amerika səfirliyinin İrəvandakı 2000 nəfərlik personalı fonunda İranın Ermənsitanda güclü casus şəbəkəsi, dövlət idarələrində möhkəm dayağı və külli miqdarda maliyyəylə fəaliyyət göstərən vətəndaş fəalları var. Ona görə də Naxçıvana kommunikasiyaların açılması nəinki 42 km-lik yolu, bütövlükdə Ermənistanın özünü Zəngəzur dəhlizinə çevrəcəyini nəzərə alaraq, İran Paşinyana ultimatum verdi, hərbi və iqtisadi şantaj etdi. Sonra İrəvanla Şuşa bəyannaməsinə oxşar hərbi müttəfqilik sazişini irəli sürdü. Lakin Paşinyan Qərbyönlü kursa xələl gələcəyindən qorxaraq və Avropa Birliyindən gözlədiyi 2.6 milyard avronu itirməmək üçün Tehrandan məsafəli davranır. Yoxsa, bir millət iki dövlət formuluna cavab olaraq, İranla Ermənistan “iki millət, bir dövlət” olduqlarını irəli sürərlər!
Dünən dəyərli Fazil Mustafa hospital palatasını səngərə çevirərək ona atəş açanlara, “cismimizi hədəf ala bilərsiniz, lakin ruhumuzu təslim edə bilməzsiniz” söylədi, ölkə rəhbərinə və dövlətin gücünə inamını ifadə etdi. Hər gün açıq səhnəyə çıxan düşmənlər Vətən müharibəsində qələbəmizin böyüklüyünü göstərirlər. Fransa, Avropa və İran Parlamenti necə də bir-birinə bənzəyirlər.
Üçüncüsü, İranın casusluq şəbəkələri təkcə iradəsi zəif olan dini-inanclı düşərgədə və mərasim zallarında deyil, başqa səviyyələrdə də dərin kök atıblar. Məsələn, mühüm iqtisadi-maliyyə sferasında İranın xüsusi xidmət orqanlarına bağlı olanlara şübhə yoxdur. Normal münasibətlər dövründə iranlı iş adamları ölkəmizin iqtisadi-maliyyə-bank sisteminin müxtəlif həlqələrinə nüfuz ediblər. Qonşu ölkədə hakimiyyətin nəzarətində olan dövriyyəsi milyon dolları keçən biznes şirkətlərinin ölkəmizdə kök salanları Ettelatın, İnqilabçı korpusun bir parçasıdır. İndi siz Bank Melli İrandan danışın, görün, nə qədər daşlar yerindən tərpənəcək.
Dördüncüsü, İran və Ermənistandan başqa Azərbaycanda siyasi terror həyata keçirən dövlətlər olmayıb. Ulu Öndərin və prezident İlham Əliyevin Qərb dövlətlərinin təzyiqinə baxmayaraq, antiİran koalisiyasına qoşulmamağımızın mükafatını belə qaytarırlar. Azərbaycan seçim ərəfəsindədir.
Beşincisi, İran ordusu Ermənistan sərhədlərini havadan və peykdən qoruyur. Biz dini bir, dili bir qardaşlarımızı düşmən səngərinə atan qüvvələrin niyyətlərini bilirik-onlar Rusiya-Ukrayna vahid xalqını düşmən edənlər kimi biz azərbaycanlıları da Araz çayından qarşı duran səngərlərə çəkilib atəş açmağa təhrik edirlər ki, əbədi düşmənə çevrilək. İran narahatdır ki, Azərbaycan Naxçıvanla birləşən kimi, Ermənistanla 28 kmlik sərhəd bağlanacaq və o, Qafqazdan təcrid olunacaq. Sən demə, İranın Qafqazla min illik sərhədi Azərbaycana verildiyi üçün Zəngəzur Ermənistandan ayrılıb. Sual olunur, məgər Rusiya imperiyasına məğlubiyyətin günahı biz azərbaycanlılardadır?"
Millət vəkili bildirib ki, “şiələrin kütləvi həbsi” təbliğatı radikal dini qrupların silahlı hücumlarına rəvac vermək, dini tolerantlıq mühitini və məzhəblərarası vəhdəti pozmağa xidmət edir:
"Guya din dövlətə qarşıdır, hakimiyyət din əleyhinə siyasət aparır, dövlət rəsmiləri dini etiqad baxımından əks qütbdədir. Təmsil etdiyim Mərkəzin keçirdiyi sorğu nəticələrinə əsasən, əhalinin 97%-nin dini etiqadının İslam, 19%-nin özünü məhz şiə məzhəbinə aid etməsi və 18%-nin həyatını dini dəyərlər üzərində qurmasına baxmayaraq, İran amilinin milli, yəni fars milliyyətçiliyi zəmində deyil, məhz dini rejim zəmində tirajlandığını görürük. İranın ölkəmizdə sosial bazası sarsılıb, müxtəlif tellərlə mənəvi, dini və iqtisadi bağı olanlar son 3 ildə zəifləyiblər. Lakin o dayaqlar hələ var. Milli Təhlükəsizlik Nazirliyinin başı qəsdlərə və soyğunçuluğa qarışanda onlar içəridə şəbəkə qurublar. Azərbaycan məscidləri İranın ideoloji təlimləri və casusluq şəbəkələrini genişləndirməsi üçün hərbi qərərgaha çevrilib. Əlbəttə, dini, İslamı “İranla “eyniləşdirmək, milyonlarla inanclını onların sosial bazası kimi göstərmək yolverilməzdir. Görün, bu qədər xəyanətlərin qarşısında biz qalib gəlmişik. O casus şəbəkələri son 3 ildə yaranmayıb, tam əksinə dövlət təhlükəsizliyimiz Qələbədən sonra möhkəmlənib. Əgər təmizləməsək, daxili cəbhələr artacaq. Biət edənlərin sayı minlərlə deyil, lakin təcrid olunmasalar, təhlükə böyüyəcək. Çünki casusluğa cəlb olunanlar gec partlayan minalara bənzəyir. İşimiz təkcə azad torpaqları minasızlaşdırmaq deyil. Biz qalib dövlətdən, qalib vətəndaşa çevrilməliyik!
Təmsil etdiyim Mərkəzin keçirdiyi sorğu nəticələrinə əsasən, əhalinin 97%-nin dini etiqadının İslam, 19%-nin özünü məhz şiə məzhəbinə aid etməsi və 18%-nin həyatını dini dəyərlər üzərində qurmasına baxmayaraq, İran amilinin milli, yəni fars milliyyətçiliyi zəmində deyil, məhz dini rejim zəmində tirajlandığını görürük.Yəni, Iranın ölkəmizdə sosial bazası zəifdir, müxtəlif tellərlə mənəvi, dini və iqtisadi bağları olanlar son 3 ildə zəifləyiblər. Lakin o dayaqlar hələ də var. Milli Təhülkəsilzik Nazirliyinin vətəndaşlarımıza qarşı qəsd və soyğunçuluğa başı qarışanda onlar içəridə sistemli şəbəkə qurublar.
Biz Çinin vasitəçiliyi ilə qlobal dəyişilkliyi görürük-Səudiyyə dövləti ilə İran arasında diplomatik münasibətlər başlaya bilər, hətta İsraillə İran arasında gizli görüşlər həyata keçirlir, lakin Tehranda Bakını heç vaxt bağışlamayacaqlar. Onlar 200 il əvvəl Rusiya ilə müharibədə itirdiklərinin qisasını bizdən almaqdan geri çəkilməyəcəklər.
Ötən il İran-Ermənistan arasında ticarət dövriyyəsi 44 faiz artaraq, 638 milyon dollar olub. Embarqolar səbəbindən ucuz qiymətə satılan mavi yanacağın son dayanacağı Xankəndidir. Qarabağı iqtisadi cəhətdən ayaqda saxlayan İrandır. Maraqlıdır ki, mehri dəhlizinin rekonstruksiyasına 18 milyon dolları ayıran isə Avropa İttifaqı və Yenidənqurma və İnkişaf bankıdır.
Lakin biz onu da yaxşı görürük, 3-cü dövlətlər ölkəmizin İranla gərginliyinin inkişafında maraqlıdır və özlərinin apardıqları savaşın ön cəbhəsinə bizi atmağa cəhd edirlər".
Zahid Oruc yekunda bildirib ki, Azərbaycanda Yaşıl Bayraqlı dövlət qurulmayacaq:
"Dünyəvilik bizim artıq qanımıza, canımıza keçib. əsrlərlə bu torpaqları tutan imepriylar dağılsa. İndi dünya xəritəsində Azərbaycan adlı dövlət var. Ona görə də ölkəmiz İrana qarşı 3-cü ölkələrdən hərbi yardım istəməyəcək. Prezidentin siyasi xarakterini, dəmir iradəsini hər kəs bilir. Biz hərbi meydanda tək döyüşdük deyən ölkə rəhbərinin strateji kursu qoy hamıya bəlli olsun-Azərbaycanla savaşdıqca, İran Azərbaycanlaşacaq!"
