Paşinyan məxfi “Qarabağ planı”nı ağzından qaçırdı - Petrov
Ermənistanın Baş naziri Nikol Paşinyan gözlənilmədən İrəvanın Qarabağ ermənilərinin gələcəyi ilə bağlı planlarını açıqlayıb. İrəvanın planı Qarabağ ermənilərini Ermənistana və başqa ölkələrə mühacirətə məcbur etməkdir. Məhz bu məqsədlə İrəvanın Qarabağdakı marionetləri indi Laçın yolunda azərbaycanlı ekoloqların dinc etirazını bəhanə edərək humanitar böhran yaratmağa çalışırlar: qazı, işığı müntəzəm olaraq kəsirlər, insanlara yemək almağa qadağa qoyurlar, onların həyatını dözülməz etmək üçün hər şey edirlər.
Axar.az xəbər verir ki, bunu rusiyalı analitik Andrey Petrov deyib.
“Paşinyan hökumətin iclasında gizli məlumatları necə yaydığının fərqinə varmayıb. Onun nöqteyi-nəzərindən, o, adəti üzrə Ermənistan hakimiyyətinin günahını Azərbaycanın üzərinə ataraq Bakını ittiham edirdi. O bildirib ki, Ermənistan xüsusi xidmət orqanları “Bakı planı” qurub: “İnsanların yaşayış şəraitinə və psixikasına təzyiqi son həddə çatdırmaq, sonra Laçın yolunu açmaq və Qarabağ ermənilərinin ordan çıxmasını təmin etmək, onu yenidən bağlamaq və Qarabağı bütün ermənilər tərk edənə qədər bunu davam etmək”. Təbii ki, o, bu xəyali hadisəni “etnik təmizləmə” kimi qiymətləndirərək əlavə edib ki, bu yolla Bakı sülh danışıqlarını pozmaq və Cənubi Qafqazda müharibəyə başlamaq istəyir. Burada, ilk növbədə, Ermənistan rəhbərinin gəldiyi qənaətlərdəki məntiqi uğursuzluğu qeyd etmək lazımdır. Bakı Qarabağ iqtisadi rayonunda yerli erməni əhalisinin saxlanmasına sadiqdir.
Lakin bütün ermənilərin Azərbaycandan mühacirət etməsi regionda yeni müharibənin başlaması üçün heç bir ilkin şərt yaratmayacaq. Birincisi, ona görə ki, belə bir kütləvi köçlə Ermənistanın qeyri-qanuni silahlı birləşmələri Qarabağı tərk edəcək, yəni Azərbaycan ərazisində hərbi əməliyyatlar təhlükəsi nəhayət aradan qalxacaq. İkincisi, Azərbaycan sülhsevər dövlətdir, öz iqtisadiyyatının inkişafında maraqlıdır, qonşuları və xarici oyunçularla birgə böyük regionlararası layihələr həyata keçirir. Azərbaycan Ermənistanla heç bir müharibədə qətiyyən maraqlı deyil. Ermənistan isə əksinə, regional iqtisadi fəaliyyətdə iştirak etməyən, Azərbaycana qarşı revanşist planlarına dəstək müqabilində yalnız şərti sədaqətini hər hansı qüvvələrə satan peyk ölkə kimi, ölkəsinin məğlubiyyətdən sonra özünə başqa çıxış yolu görmür. Qarabağ müharibəsi, yeni toqquşmalar istisna olmaqla. Moskva Ermənistan-Azərbaycan münaqişəsinin təkrarlanmasının qəti əleyhinədir, ona görə də indi İrəvan Tehran və Parislə əlaqələri gücləndirir”, - o bildirib.
Petrov qeyd edib ki, Laçın yolundakı aksiya İrəvan üçün fürsətə çevrilib:
“İrəvanın Bakıdan bu cür məxfi görünən məlumat “sızması” üçün kanalları yoxdur, lakin Paşinyan çox nadir hallarda öz başı ilə nəsə fikirləşir. O, Ermənistanın cinayətlərini, yaramazlıqlarını götürüb Azərbaycana aid edir, bu onun ritorikasıdır. “Bakı planı” əslində İrəvanın ermənilərin Qarabağdan kütləvi köçməsinə yönəlmiş planıdır. Paşinyanın sözlərinə bu rakursdan baxsanız, onun adi yalanlarının parçaları birləşərək ardıcıl və kifayət qədər inandırıcı mənzərə yaradır. Heç kimə sirr deyil ki, Ermənistanın hazırkı hakimiyyəti kifayət qədər uzun müddətdir ki, Qarabağdakı separatçı layihəni ləğv etməyin yolunu axtarır. Rəsmi İrəvan sadəcə olaraq bu layihənin birbaşa ləğvini elan edə bilməz. Çünki diaspor və erməni millətçiləri buna qarşı çıxacaq və bu, Paşinyanın hakimiyyətdən uzaqlaşdırılması üçün bəhanəyə çevriləcək. Ona görə də Qarbağdan qanunsuz filiz hasilatına etiraz edən ekoloji fəalların Laçın yolundakı aksiyası İrəvana belə bir yol açıb. İrəvan Xankəndidə humanitar böhran imitasiyasını əsl fəlakətə çevirməyə və ermənilərin Qarabağı tərk etməsinə çalışır. Beləliklə, İrəvan separatçı layihəni ləğv edib, Bakını “etnik təmizləmə”də ittiham edəcək. Qarabağ ermənilərinə qarşı “etnik təmizləmə” İrəvan tərəfindən hazırlanır. Paşinyan da məhz bunu fərqinə varmadan çıxışında bildirdi”.
